Azərbaycan Dəmir Yolları" Qapalı Səhmdar Cəmiyyətində 31 dekabr - Dünya Azərbaycanlılarının həmrəyliyi gününə və Yeni 2018-ci təqvim ilinə həsr olunmuş yığıncaq keçirilib.

İllərin qovuşuğunda keçirilən tədbiri giriş sözü ilə Tədbiri giriş sözü ilə “Azərbaycan Dəmir Yolları” Qapalı Səhmdar Cəmiyyətinin sədri Cavid Qurbanov açaraq, iştirakçıları, onların şəxsində bütün xalqımızı 31 dekabr - Dünya Azərbaycanlılarının Həmrəylik Günü və yeni 2018-ci təqvim ili münasibətilə ürəkdən təbrik edib, dəmir yolunda çalışan insanlara  möhkəm cansağlığı, uzun ömür, xoş güzəran diləyib.

O, bildirib ki, təqvimdə bir çox  əlamətdar günlər var. Ölkəmizin yaxın və uzaq keçmişinin müəyyən məqamlarını özündə əks etdirən bu tarixi günləri yaşatmaq olduqca gərəklidir. Çünki həmin günlərdə Azərbaycan tarixinin hansısa mühüm anı yaşayır.  Onlardan biri də ulu öndərin təşəbbüsü ilə təsis edilən 31 dekabr-Dünya Azərbaycanlılarının həmrəyliyi günüdür. Bu bayramın elan olunması bizim yaxın tariximizdə baş verib.

Ümummilli lider Heydər Əliyev hələ Naxçıvan Muxtar Respublikası Ali Məclisinin sədri olarkən ilk dəfə, 16 dekabr 1991-ci il tarixli sərəncamı ilə 31 dekabrı Dünya Azərbaycanlılarının Həmrəylik  və Milli Birlik bayramı elan etmiş, sonra isə bu tarix bütün Azərbaycan xalqının, dünyanın müxtəlif ölkələrində yaşayan milyonlarla soydaşımızın milli bayramına çevrilib.

İl ərzində dəmir yolunda görülən işlər haqqında geniş məlumat verən C. Qurbanov bildirib ki, Azərbaycan Respublikasının Prezidenti İlham Əliyevin qayğısı ilə dəmir yolunda həyata keçirilən islahatlar, 2017-ci il fevralın 10-da Bakı dəmir yolu vağzalında və “Azərbaycan Dəmir Yolları” QSC-nin inzibati binasında aparılmış yenidənqurmadan sonra yaradılan şəraitlə tanış olması,  oktyabrın 30-da Bakı-Tbilisi-Qars dəmir yolunun açılış mərasimində iştirakı, görülən işləri  yüksək dəyərləndirməsi dəmiryolçularda böyük ruh yüksəkliyi yaradıb.

Natiq  dəmir yolunda ən müasir standartlara cavab verən texnologiyaların işə tətbiq olunması, enerji təchizatının sabit cərəyandan dəyişən cərəyana keçilməsi, işarəvermə və rabitə sisteminin  yeniləşdirilməsi üzrə avadanlıqların alınması, yol təsərrüfatının sağlamlaşdırılması, lokomotiv və vaqon parklarının yenilənməsi və digər sahələrdə görülən işlər haqqında ətraflı danışıb. 

Sonra Azərbaycan Respublikasının Prezidenti İlham Əliyevin dəmir yolu işçilərinin peşə bayramı və Bakı-Tbilisi-Qars dəmir yolu xəttinin istifadəyə verilməsi münasibətilə imzaladığı sərəncamlara əsasən, ali dövlət mükafatlarına layiq görülən bir qrup dəmiryolçuya mükafatlar təqdim edildi.

İllərin qovuşuğunda keçirilən  tədbiri yekunlaşdıran “Azərbaycan Dəmir Yolları” Qapalı Səhmdar Cəmiyyətinin sədri Cavid Qurbanov qarşıda duran perspektiv vəzifələrdən danışdı və 2018-ci ildə hər kəsə uğurlar arzuladı.

AzerTaym.az