Nəticələri ləğv olunan seçki dairələrində lider namizədlərdən ikisi təkrar seçkiyə qatılacaq.

"AzerTaym.az" yenisabah.az-a istinadən xəbər verir ki, 35 saylı Xətai üçüncü seçki dairəsinin lider namizədi Rauf Arifoğlu və 80 saylı İmişli-Beyləqan seçki dairəsinin lider namizədi Çingiz Qənizadə artıq təkrar seçkidə iştirak edəcəklərini bəyan ediblər.

Nəticələri ləğv edilən 74 saylı Lənkəran kənd seçki dairəsinin lider namizədi Hadı Rəcəbli ilə 33 saylı Xətai birinci seçki dairəsinin lider namizədi Hüseynbala Mirələmovun isə təkrar seçkilərə qatılmayacağı bildirilir.

Bu arada qeyd edək ki, Hadı Rəcəbli artıq Milli Məclisdəki kabinetini də boşaldıb.

9 fevral seçkilərində Hüseynbala Mirələmovla Hadı Rəcəblinin namizədliyi hakim Yeni Azərbaycan Partiyası (YAP) tərəfindən irəli sürülmüşdü. Onların qələbəsinin tanınmaması hakimiyyətə yaxın şəxslər üçün seçkilərin demokratik keçirilməsi barədə iddialarını əsaslandırmaq baxımından tutarlı arqumentə çevrilib. Yəni, "Əgər seçki qeyri-demokratik keçirilbsə, o zaman niyə YAP-ın iki qocaman, həm də illərlə hakim partiyanı Milli Məclisdə təmsil edən üzvününün qələbəsi tanınmadı?" hakimiyyətin siyasi xəttini dəstəkləyənlərin əsas ritorik suallarından biridir. Bu halda Hüseynbala Mirələmovla Hadı Rəcəbli yenidən seçkiyə qatılsa, o zaman yuxarıdakı ritorik sual əhəmiyyətini itirə bilər.