“Barselona”dan qalmaqallı şəkildə ayrılıb Fransanın “PSJ” klubuna transfer edilən braziliyalı futbolçu Neymar 2018 Dünya Çempionatında qalib gələ biləcək komandaların adını açıqlayıb.

AzerTaym.az xəbər verir ki, “Red Bull” saytına müsahibə verən ulduz Braziliya, Almaniya, İspaniya, Fransa və Aregntinanın favorit olduğunu bildirib: “Bu komandalar istənilən turnirin formatını bəlli edəcək keyfiyyətdədirlər. Mənim sürpriz namizədim isə Belçikadır. Əla komandaları var və kubokun sürpriz sahibi ola bilərlər. Bundan başqa, Məhəmməd Salah möhtəşəm bir oyunçudur və komandası Misir ilə fərqlilik yarada bilər.

Biz isə hazırda 2014-cü ilə nisbətən daha yaxşı vəziyyətdəyik. Həmin dövrdə mən meydançada olmasam belə 7:1 hesabı ilə alman təmsilçisinə məğlub olmağımız ən çox mənə təsir etdi. Ancaq indi daha ağıllı və təcrübəliyəm. 2018-də 2014-dəkindən daha fərqli bir Neymar izləyəcəksiniz”.