Zabit Səmədov 1 milyon dollar uğrunda döyüşə girir
Aprelin 17-də Dubayda K-1-in azərbaycanlı döyüşçüsü Zabit Səmədov növbəti döyüşünü keçirəcək.
"AzerTaym.az" Oxu.az-a istinadən xəbər verir ki, bu, Global Fighting Championship 4 Man Heavyweight Tournament-in yarımfinal döyüşüdür.
Zabitin rəqibi 38 yaşlı Stiv Makkinnon olacaq. Hesabında olan 52 döyüşün 45-də (40-ı nokaut ilə) Makkinnon qələbə qazanıb və 7-də məğlub olub.
Zabit Səmədov öz opponentindən gəncdir (30 yaş), amma daha təcrübəlidir. Azərbaycanlı döyüşçünün aktivində 82 döyüş var, onların 72-də qələbə qazanıb (35-i nokaut ilə).
Digər yarımfinalda isə iranlı Cəfər Əhmədi və alman Dano İlinqa görüşəcəklər.
Yarımfinalın qalibləri 1 milyon dirhəm (təxminən 272 min Amerika dolları) alacaq. Final dekabrda baş tutacaq. Onun qalibi isə 1 milyon dollar qazanacaq.
