20.09.2014- Neft Fonduna 200 milyard dollar gələcək
Hazırda fondda 37 mlrd. dollardan çox vəsait var
Növbəti illərdə bütün layihələr üzrə Azərbaycan Dövlət Neft Fonduna 200 milyard dollara yaxın vəsaitin daxil olması gözlənilir.
Bunu jurnalistlərə açıqlamasında Azərbaycan Dövlət Neft Fondunun (SOFAZ) icraçı direktoru Şahmar Mövsümov bildirib.
Onun sözlərinə görə, indiyə qədər SOFAZ-ın vəsaitləri qaçqın və məcburi köçkünlərin həyat şəraitinin yaxşılaşdırılmasına, Bakı-Tbilisi-Ceyhan əsas ixrac neft boru kəmərində Azərbaycanın payının maliyyələşdirilməsinə, Bakı-Tbilisi-Qars dəmir yolunun maliyyələşdirilməsinə, Oğuz-Qəbələ su kəmərinin, Taxtakörpü su anbarının tikintisinə, Samur-Abşeron kanalının yenidən qurulmasına, tələbələrin xarici ölkələrin universitetlərində oxumasına yönəldilib.
Ş. Mövsümov onu da qeyd edib ki, bu gün təməli qoyulan Cənub Qaz Dəhlizinin maliyyələşdirilməsi ARDNF-in vəsaiti hesabına həyata keçiriləcək:
“Bu maliyyələşdirmə həm Azərbaycanın dövlət payının maliyyələşdirilməsi, həm də ARDNŞ-in nizamnamə kapitalının artırılması ilə həyata keçiriləcək. Biz əminik ki, bu vəsaitlər səmərəli istifadə olunacaq, Cənub Qaz Dəhlizi işə salınacaq və bu vəsaitlər əldə olunan gəlirlər hesabına Neft Fonduna qaytarılacaq”.(apa)
