Bu gün Səbail rayon Məhkəməsində xalq artisti İlhamə Quliyevanın həbsdə olan köməkçisi Mehriban Hüseynovanın barəsində seçilmiş həbs qətimkan tədbirinin müddətinin uzadılması barədə istintaq orqanının verdiyi vəsatətə baxılıb.

Ölkə.Az xəbər verir ki, vəkil Vasif Mirzəyev APA-ya bildirib ki, prosesdə müdafiə etdiyi şəxsin barəsində seçilmiş həbs qətimkan tədbirinin uzadılacağı təqdirdə onun ev dustaqlığı ilə əvəz olunması barədə vəsatət verib.

Məhkəmə vəsatəti təmin etməyib. Mehriban Hüseynova barəsində seçilmiş həbs qətimkan tədbirinin müddətinin 3 ay müddətinə uzadılması barədə qərar qəbul edilib.

Vəkil bazar ertəsi qərardan apellyasiya şikayəti verəcəyini bildirib.

Qeyd edək ki, M. Hüseynova Cinayət Məcəlləsinin 29.180-ci (soyğunçuluq etməyə cəhd) maddəsinə əsasən ittiham olunur.