Kəbədə bayram namazı qılınıb (VİDEO)
Həcc ziyarətinin ən həyəcanlı məqamlarından biri olan “bayram namazı” bu səhər Kəbə ətrafında milyondan çox zəvvarın iştirakı ilə böyük coşğu ilə qılınıb.
ANS-nin məlumatına görə, Həcc ziyarətini yerinə yetirmək üçün dünyanın dörd-bir yanından Səudiyyə Ərəbistanına gələn zəvvarlar Qurban bayramının ilk gününü böyük coşğu ilə qarşılayıb. Bayram namazı üçün Kəbeyi-Şərif ətrafına toplaşanlar bayram namazından sonra bir-biri ilə bayramlaşaraq, dualar ediblər.
Namazdan sonra zəvvarlar Müzdəlifədə topladıqları daşları götürüb Mina dağına hərəkət edib və burada Şeytana daşlayıblar.
Azərbaycanda isə bayram namazı sabah saat 9-da Təzəpir də daxil olmaqla ölkənin bütün məscidlərində qılınacaq. Qafqaz Müsəlmanları İdarəsindən verilən məlumata görə, ayın görünməsindən asılı olaraq Azərbaycanda sabah qurbanlar kəsiləcək.
