İranın Xuzestan vilayətində su qıtlığına və digər sosial problemlərə görə günlərdir davam edən etirazlar Cənubi Azərbaycana - Təbriz şəhərinə də sıçrayıb.

Virtualaz.org xəbər verir ki, bu gün iyulun 24-də Təbriz küçələrinə çıxan azərbaycanlılar Xuzestan sakinlərinin etirazlarına dəstək ifadə ediblər və təhlükəsizlik qüvvələrinin etirazçılara qarşı silah işlətməsini pisləyiblər. Habelə azərbaycanlılar “Azərbaycan, Ələhvaz!”, “İttihad, ittihad!” şüarları da səsləndiriblər.

AN.T (aznews.tv) Güney Azərbaycan televiziyasına cənubdan daxil olan görüntülərə əsasən Təbriz küçələrinə çıxan minlərlə etirazçıya polis və motosikletli “Bəsic” üzvləri müdaxilə etməyə çalışır. Bəzi yerlərdə təhlükəsizlik qüvvələri ilə toqquşmalar baş verib. 

Etirazlar xaotik xarakter daşıyır və təşkil edilməyib, çünki cənublu milli fəalların əksəriyyəti hazırda həbsdədir və Cənubi Azərbaycanda təşkil edilmiş etirazların keçirilməsi hazırda mümkün deyil.

Xəbər verildiyi kimi, İranın Xuzestan (bölgə sakinləri -etnik ərəblər bu əyaləti Əl-Əhvaz adlandırırlar,-red.) bölgəsində su qıtlığına görə günlərdir kütləvi etirazlar keçirilir və təhlükəsizlik qüvvələri ilə toqquşmalar nəticəsində artıq 7-yə yaxın adam həlak olub. Onlardan biri də polis zabitidir. Problemə səbəb həm İranda uzun müddətdir davam edən quraqlıq, həm də illər əvvəl Xuzestan bölgəsindən keçən çayların səmtinin dəyişdirilməsi və onların metallurgiya zavodları yerləşən bölgələrə axıdılmasıdır. İranın Ali dini lideri ötən gün Xuzestan sakinlərinin tələblərinin haqlı olduğunu bildirib və məmurları insanların problemlərini həll etməyə çağırıb.