Ucar rayonunun bir qrup sakini tərəfindən “Hürriyyət”in redaksiyasına şikayət məktubu daxil olub. Qəzetimiz vasitəsilə Prezident İlham Əliyevə, Birinci vitse-prezident Mehriban Əliyevaya, eləcə də Əmək və Əhalinin Sosial Müdafiəsi naziri cənab Sahil Babayevə və Azərbaycan Respublikasının İnsan Hüquqları üzrə Müvəkkili (Ombudsman) Səbinə Əliyevaya müraciət edən sakinlərin müraciətini olduğu kimi dərc edirik:

“Hörmətli Prezident!

Bu şikayət ərizəmizdə yazıb Sizə bildiririk ki, Ucar rayon Məşğulluq Mərkəzinin müdiri Samir Nuriyev vəzifə səlahiyyətlərindən sui-istifadə edərək, heç bir əsas və səbəb olmadan vətəndaşlara qarşı kobud hərəkətlər edir, onları təhqir edir, alçaldır, hətta insanlara zor tətbiq etməkdən belə çəkinmir.

Bu şikayət ərizəsini imzalayan hər bir Ucar rayon sakini Samir Nuriyevin kobud rəftarına, təhqirinə, qanunsuz əməllərinə məruz qalıb. Buna görə, biz qərara aldıq ki, mətbuat vasitəsi ilə Prezident cənab İlham Əliyevə, Mehriban xanım Əliyevaya, Əmək və Əhalinin Sosial Müdafiəsi naziri cənab Sahil Babayevə və Ombudsmana müraciət edək.

Xahiş edirik, şikayət ərizəmizi yerində, bizim iştirakımızla araşdırıb, vətəndaşlarla etkadan kənar kobud rəftar edən, insanları açıq-aşkar çəkinmədən təhqir edən Ucar rayon Məşğulluq Mərkəzinin müdiri Samir Nuriyevin barəsində ciddi tədbirlər görəsiniz.

Mən, Mehdiyev Bayram Qüdrət oğlu, 70 yaşım var, el-oba arasında nüfuz və hörmətim var. Oğlum Asif 2018-ci il tarixdən işsiz kimi Ucar rayon Məşğulluq Mərkəzində qeydiyyata alınıb. Ata olaraq narahat olub oğlum Asifin işi ilə maraqlanmaq üçün Ucar rayon Məşğulluq Mərkəzinə getdim. Həmin vaxt oranın müdiri Samir Nuriyev mənə dəhlizdə kobuscasına dedi ki, “nəyə gəlmisən?”. Ona oğlum Asif Mehdiyevin işsiz kimi burada qeydiyyatda olmasını bildirib, nə vaxt işlə təmin olunacağını soruşduqda, ucadan qışqıraraq “İş yoxdur, buranı tərk et” cavabını verib, kobud hərəkətlər etdi. Mən ona övladım yaşda olduğunuı bildirib, etikalı, səbrli, sakit danışmağı, kobudluq etməməyi xahiş etdikdə, o, daha da coşub, qışqıra-qışqıra dedi ki, “mən sənin övladın ola bilmərəm, rədd ol buradan, düdüyün biri düdük” deyərək, məni nalayiq şəkildə təhqir etdi.

Mənim 70 yaşım var, indiyə qədər belə ədəbsiz, nalayiq hərəkət edən, insanları alçaldan vəzifəli şəxslə rastlaşmamışdım. Ucar rayon Məşğulluq Mərkəzinin müdiri Samir Nuriyevin mənə qarşı etdiyi etikadan kənar, nalayiq hərəkətlər mənə çox pis təsir etdi, əsəb sarsıntısı keçirdim.

Sonradan mənə tanışlar dedilər ki, Ucar rayon Məşğulluq Mərkəzinin müdiri Samir Nuriyevin xasiyyəti belədir, insanlarla belə etikadan kənar, kobud şəkildə davranır, hətta əlbəyaxa davalar da edir, artıq bu vəzifəyə təyin edildiyi qısa müddət ərzində insanlara arasında ciddi narazılıqlar yaradıb.

Mən, Şirinov Raqif Ayaz oğlu, himayəmdə iki azyaşlı uşağım var. Həyat yoldaşım və mən işsizik. İşlə təmin olunmaq üçün uzun müddətdir ki, Ucar rayon Məşğulluq Mərkəzində işsiz kimi qeydiyyatdayam. İşlə maraqlanmaq üçün Ucar rayon Məşğulluq Mərkəzində getmişdim. Həmin vaxt mərkəzin müdiri Samir Nuriyev mənimlə kobud rəftar etdi, dedi ki, “işin yoxdur, ailəni dolandıra bilmirsənsə, get özünü öldür”. Mən bundan çox məyus oldum, hətta gözümə qaranlıq gəldi ki, ali təhsilli idarə rəhbəri mənə gör nə təklif edir. Bunu təsdiq edən şahidlər var ki, araşdırma aparılan zaman adlarını göstərəcəm.

Ucar rayon Məşğulluq Mərkəzinin müdiri Samir Nuriyev demək olar ki, hər gün vətəndaşlarla belə kobud rəftar edir, acılayır, təhqir edir. Belə insanın dövlət qulluğunda işləməsi yolverilməzdir.

Onu da qeyd edim ki, bu barədə şikayət ərizələri ilə müraciətlər etdikdən sonra işlə təmin olunmuşam. Ancaq xahişim belə bir insanın qanuni qaydada cəzalandırlmasıdır.

Mən, SəfiyevHaqverdi Səfi oğlu, 3-cü qrup gözdən əliləm ki, buna görə hər ay 230 manat təqaüd alıram. Himayəmdə böyüyünün 8, ortancılının 7 yaşı və kiçiyi 9 aylıq olmaqla 3 uşağım var. İki uşağım məktəbli olsa da, imkansızlıqdan dərsə getməyiblər. Çünki ailəmizdə heç kəs işləmir. Ancaq 3-cü qrup əliliyə görə aldığım 230 manatın ümüdinə aclıq, yoxsulluq və səfalət içində yaşayırıq. Buna isə yaşamaq demək olmaz. Həmçinin sağ gözüm kordur. Kənddə yaşasaq da iri və xırdabuynuzlu heyvanlarımız yoxdur. Tövləmiz və torpaq sahimz var. Ancaq maddi imkanımız yoxdur ki, iri və ya xırdabuynuzlu heyvan alıb, saxlayıb, gəlir əldə edib normal dolanaq. Buna görə mən özünüməşğulluq proqramında iştirak edib, aktivlə təmin olunmaq üçün Ucar rayon Məşğulluq Mərkəzinə müraciət etdim. Müdir Samir Nuriyev mənə qarşı kobudluq göstərdi, etik normalara uyğun olmayan kobud rəftar etdi. Bu adam vətəndaşlarla çox kobud nifrət və qəzəblə rəftar edir. Buna görə mən bir daha Ucar rayon Məşğulluq Mərkəzinə getmədim. Çünki Samir Nuriyevin etikadan kənar tərbiyəsiz hərəkətləri mənə çox pis təsir göstərdi.

Mən, Kərimbəyli Emin Mustafa oğlu, özüm və həyat yoldaşım işsizik. İşlə təmin olunmaq üçün uzun müddətdir ki, Ucar rayon Məşğulluq Mərkəzində işsiz kimi qeydiyyatdayam. İşlə maraqlanmaq üçün atam Kərimov Mustafa Oktay oğlu Ucar rayon Məşğulluq Mərkəzinə gedən zaman mərkəzin müdiri Samir Nuriyev onunla kobud rəftar edib, ona “rədd ol buradan, çıx get” deyib. Mən bunu eşidib çox pis oldum. Çünki Samir Nuriyevə bu haqqı kim verib ki, 55 yaşlı kişiyə “rədd ol buradan, çıx get” deyir. Mən eşitmişəm ki, Ucar rayon Məşğulluq Mərkəzinin müdiri Samir Nuriyev insanlarla çox pis rəftar edir, vətəndaşları təhqir edir, pozğun hərəkətlərə yol verir. Belə insanın dövlət qulluğunda işləməsi yolverilməzdir.

Mən, İsmayılov Fikrət Qüdrə oğlu, bildiriəm ki, ailəm 4 azyaşlı uşaq olmaqla, 6 nəfərdən ibarətdir. Özüm “DOST” İş Mərkəzi MMC-nin xətti ilə ictimai işlərdə fəhlə işləyirəm ki, buna görə ayda 250 manat maaş alıram. 4 azyalşı uşağın, 6 nəfərlik ailənin başqa gəliri yoxdur. Buna görə acınacaqlı vəziyyətdə yaşayırıq. Elə olur ki, adi quru çörək almağa maddi imkanımız olmur. Aldığım maaş 6 nəfərlik ailənin 10 gün normal yaşamağına güclə çatır. Həyat yoldaşım işlə təmin olunmaq üçün Ucar rayon Məşğulluq Mərkəzində bir ildən çoxdur ki, qeydiyyatdadır. Həyat yoldaşımın işlə nə vaxt təmin olunacağı ilə maraqlanmaq üçün 12 may 2020-ci il tarixdə Ucar rayon Məşğulluq Mərkəzində oldum. Həmin vaxt idarənin müdiri Samir Nuriyev heç bir əsas olmadan mənimlə kobud rəftar edib, alçaldıb, məni idarədən qovdu. O, mənə dedi ki, “Prezident İlham Əliyevin göstərişi var, bir ailədən bir nəfər işləyə bilər, buna görə sənin həyat yoldaşın işlə təmin oluna bilməz, sən kanal, zibil təmizləyənə oxşamırsan, üstün təmizdir, başına molla papağı qoymusan, get mollalığını et”. Mən Samir Nuriyevdən kobudluq etməməyi xahiş etsəm də, o, qışqıra-qışqıra dedi ki, “sənin kimilər acından ölməlidirlər, rədd ol buradan”.

Ucar rayon Məşğulluq Mərkəzinin müdiri Samir Nuriyevin mənə qarşı etdiyi etikadan kənar, nalayiq hərəkətlər mənə çox pis təsir etdi, əsəb sarsıntısı keçirmişəm. Bu şəxs vəzifəyə yaramır.

Mən, Zakirov Təvəkkül Müğdət  oğlu, Ucar rayon Məşğulluq Mərkəzinin müdiri Samir Nuriyevin mənə qarşı etdiyi qanunsuzluğa görə, ailəm aclıq içində yaşamağa məhkum olub. 2019-cu il tarixdə özünüməşğulluq proqramına qoşulmaq üçün qeydiyyata alındım, 17 günlük təlimdə iştirak etdim. Həmin təlimdə iştirak edən 16 nəfərin hamısı aktivlərlə (iri və xırda buynuzlu heyvanlarla) təmin edildilər. Ancaq mənə qanunsuz olaraq aktivlər verilmədi. Hansı ki, mən təlimdə yüksək bal topladım, həyətyanı sahəmə baxış keçirilib, otlaq sahəm və tövləm var.

Ucar rayon Məşğulluq Mərkəzinin müdiri Samir Nuriyev insanlarla kobud rəftar edir, qanunsuzluğa süründürməçiliyə yol verir. Onun bu qanunsuz hərəkətlərinə görə mənim 4 nəfərlik ailə üzvlərim aclıq içində yaşamağa məhkum edilib.

Hansı qanuna əsasən mənimlə birlikdə təlimdə iştirak etmiş 16 nəfərə aktiv verildiyi halda, mən bu hüquqdan məhrum edilmişəm?

Mən, Səfərov Elman Ağalı oğlu, bizim ailədə də heç kəs işləmir. İşlə təmin olunmaq üçün 5 ildir ki, Ucar rayon Məşğulluq Mərkəzində işsiz kimi qeydiyyatdayam. İşlə maraqlanmaq üçün bir il əvvəl Ucar rayon Məşğulluq Mərkəzinə getmişdim. Həmin vaxt mərkəzdə mənə dedilər ki, avtomobillərin yuyucu sexində boş iş yeri var, orada işləyə bilərsən. Mən onlara izah etdim ki, 55 yaşım var, böyrəklərimdə xəstəlik olduğu üçün avtomobillərin yuyucu sexində işləyə bilmərəm, çünki səhhətim buna yol verməyəcək, mənə münasib iş verin ki, işləyib ailəmi dolandıra bilim. Mənim sözümə əhəmiyyət verilmədi. Məndən sonra iş axtaran kimi qeydiyyata alınmış şəxslər isə işlə təmin olundular.

Bir ay əvvəl yenə Ucar rayon Məşğulluq Mərkəzinə iş axtarmağa gedən zaman yenə mənə avtomobillərin yuyucu sexində işləməyi təklif etdilər. Mən həmin vaxt başa düşdüm ki, Ucar rayon Məşğulluq Mərkəzinin rəhbərliyi məni ələ salır. Mərkəzin rəhbərliyinin insanlarla aqressiv davranmasını, etik qaydalara riayət etməsini insanlardan eşitmişdim və əyani şahidi oldum. Ucar rayon Məşğulluq Mərkəzinin müdiri Samir Nuriyev özünü hegemon kimi aparıb, insanları alçaldıcı sözlərlə təhqir edir, aqressiv danışr.

Mən, Həsənov Sarvan İbrahim oğlu, özünüməşğulluğa görə qeydiyyatda idim. Ucar rayon Məşğulluq Mərkəzinin əməkdaşları gəlib tövləmə baxış keçirdilər. Həmin vaxt qonşuluğumda yaşayan qardaşım Sərxanın heyvanları mənim həyətyanı sahəmdə otlayırdı. Mən onlara bunu izah etdikdə bəhanə gətirib, mənə həmin proqramdan qanunsuz olaraq çıxardılar. Mən onlara izah etdim ki, kənd icra nümayəndəsindən arayış alın, mənim iri və xırda buynuzlu heyvanım yoxdur. Ucar rayon Məşğulluq Mərkəzinin müdiri Samir Nuriyev üstümə qışqırıb dedi ki, “bizi ələ salmısan, sən kimsən, ağıllı ol, heyvana oxşayan”.

Bu insanın dövlət işində işləməsi yol verilməzdir. Qeyd edim ki, Ucar rayonda elə vətəndaşa özünüməşğulluq proqramı ilə iri və xırda buynuzlu heyvanlar verilib ki, onlar işləyirlər, heyvanları var. Buna dair faktlarım var.

Hörmətli Prezident!

Qeyd edək ki, biz hər birimiz ayrı-ayrılıqda şikayət ərizələri ilə müvafiq orqanlara müraciətlər etmişdik. Ancaq çox təssüf olsun ki, həmin şikayət ərizələrimiz araşdırlması üçün barəsində şikayət etdiyimiz Samir Nuriyevin özünə qaytarılmışdır. Burada isə bir müəmma var.

Biz, bu şikayət ərizəsini imzalayan Ucar rayon sakinləri, xahiş edirik ki, vətəndaşlarla etikadan kənar davranan, dövlət qulluğu vəzifəsinə yaramayan Ucar rayon Məşğulluq Mərkəzinin müdiri Samir Nuriyevin davranışları araşdırılsın, barəsində ciddi tədbirlər görülsün.

İmza:

1) Ucar şəhəri, Dədə-Qorqud Yaşayış Məhəlləsi sakini Mehdiyev Bayram Qüdrət oğlu;

2)  Şirinov Raqif Ayaz oğlu, Ucar şəhəri, H.Əliyev küçəsi, bina 136, mənzil 11 sakini;

3) Səfiyev Haqverdi Səfi oğlu, Ucar  rayonu Bağman kənd sakini, 3-cü qrup gözdən əlil;

4) İsmayılov Fikrət Qüdrət oğlu, Ucar şəhəri, Vaqif küçəsi, ev 8 sakini;

5) Kərimbəyli Emin Mustafa oğlu, Ucar şəhəri, Həzi Aslanov küçəsi 13 sakini;

6)  Zakirov Təvəkkül Müğdət  oğlu, Ucar rayonu, Məlikballı kənd sakini;

7) Səfərov Elman Ağalı oğlu, Ucar şəhəri, H.Əliyev küçəsi, bina 26  sakini;

8) Həsənov Sarvan İbrahim oğlu, Ucar rayonu Qarabörk kənd sakini”.

Redaksiyadan: Qarşı tərəfin mövqeyini dərc etməyə hazırıq.