“Koroğlu” metrostansiyasında ticarət bərpa olunur, bəs qəzet satışı? - FOTOLAR
Metronun “Koroğlu” stansiyasının piyada keçidində kiçik ticarət də bərpa olundu.
06-05-2024
Musavat.com-un məlumatına görə, keçid boyunca müxtəlif növ geyimlər, meyvələr satılır. Lakin satıcılar hesab edirlər ki, bu, müvəqqəti bir haldır. Onların sözlərinə görə, saat 15:00-dan tez satışa icazə verilmir. 15:00-dan 23:00-a qədər isə satıcılara heç bir maneə yaradılmır. Satıcılar mallarını yerə tökərək satırlar. Hər hansı piştaxta mövcud deyil.
Onu da qeyd edək ki, 2014-cü ildə Zaur Hüseynov Bakı Metropoliteni QSC-yə rəis təyin olunandan qısa vaxt sonra metroda ticarət ləğv edilmişdi. Ticarətin yenidən bərpa olunacağı barədə xəbərlər yayılsa da, qurum yazılanları təkzib edirdi.
Eyni zamanda metroda bütün reklamlar da ləğv edilmişdi. Lakin getdikcə bütün bunlar bərpa edildi. Hətta əlavə olaraq, metro stansiyalarının girişlərində apteklər də açıldı. Hər şey yavaş-yavaş bərpa edilsə də, bu, bir zamanlar stansiyaların girişlərində mövcud olan qəzet satışlarına şamil olunmadı.
Onu da qeyd edək ki, metroda qəzet-jurnal satışını həyata keçirən “Metroservis” firması ümumiyyətlə ləğv edilib, onun metrostansiyalardakı satış nöqtələri yığışdırılıb.
Məsələ ilə bağlı Bakı Metropoliteni QSC-nin mətbuat xidmətinin rəhbəri Nəsimi Paşayevin də mövqeyini öyrəndik.
N.Paşayev bildirdi ki, həmin keçidin metropolitenə heç bir aidiyyəti yoxdur: “Ora piyada keçididir. Ərazi olaraq bizə aid deyil. Yəni, ora nəzarət etmək, metropolitenin səlahiyyətində deyil”.
Qəzet satışının bərpasına gəlincə isə N.Paşayev bildirdi ki, belə bir məsələ müzakirə edilmir.
Fikirlər
-
Reklam
-
Əsas xəbərlər
