Livanın baş naziri Saad Həririnin Səudiyyə Ərəbistanına gedərək oradan qəfil istefasını elan etməsinin bəzi təfərrüatları məlum olub.

Virtualaz.org xəbər verir ki, “The Washington Post” qəzetinin yazdığına görə Saad Həririni Ər-Riyad aerportundan kral Salmanın iqamətgahına gedərkən yolda oğurlayıblar.

Həriri hesab edirdi ki, Ər-Riyad aeroportundan birbaşa kralın sarayına yollanacaq. Lakin hadisələr lap əvvəldən fərqli cərəyan edib. Baş naziri aerportda qarşılayanlar onu naməlum istiqamətə aparıblar, telefonunu əlindən alıblar və istefası haqda əvvəlcədən hazırlanmış mətni oxuyublar. Bundan sonra Həriri yoxa çıxıb.
Ertəsi gün Həriri Səudların nəzarətində olan “Al-Arabiya” telekanalının efirinə çıxıb və orada istefası haqda məktubunu oxuyub. Bir neçə Livan mənbəsi bildirir ki, Səudlar sülaləsi Saad Həririni qardaşı Bahiya ilə əvəz etmək istəyib. Bahiyanın ailəsini Ər-Riyada çağırıblar və orada ondan krala sədaqət tələb ediblər. Lakin Bahiya bundan imtina edib.

Ötən şənbə günü noyabrın 12-də Livan prezidenti Mişel Ayun Səudiyyə Ərəbistanından tələb edib ki, Həririnin sirli istefasına aydınlıq gətirsin. Ayun tələb edib ki, Həririni Beyrutdakı Səudiyyə səfirliyinə gətirsinlər və orada onun BMT, Avropa İttifaqı və Ərəb Liqası səfirlərinin iştirakı ilə görüşü təşkil olunsun.
Bundan bir gün əvvəl Həriri ilə Ər-Riyadda Fransa səfiri görüşüb. Görüşdən sonra Fransa XİN dumanlı bəyanat yayıb. Bəyanatdan anlaşılmır ki, Həriri ilə bağlı Ər-Riyadda nə baş verir. Orada ancaq o vurğulanır ki, Həriri Ər-Riyadda “hərəkət azadlığına” malikdir.
ABŞ dövlət katibi Reks Tillerson isə Livan hakimiyyətini ölkəni İranla Səudiyyə arasında çəkişmə meydanına çevirməməyə çağırıb. Bəyanatda bildirilir ki, Livanda Beyrutun nəzarətində olmayan qeyri-legitim hərbi birləşmələrə, xarici qüvvələrə yer yoxdur.
Xəbərlərə görə Səudiyyə Ərəbistanı Livan baş nazirini İranyönümlü mövqeyinə görə istefaya məcbur edib.