Prezidentin keçmiş köməkçisi Əli Həsənovun adı ətrafında növbəti dəfə qalmaqal yaranıb. Belə ki, Həsənov bu dəfə “Teleqraf Holdinq”in rəhbəri Aynur Camalqızını şantaj etdiyinə görə gündəmə gəlib.

 "AzerTaym.az" bilıdirir ki, bununla bağlı Axar.az saytının baş redaktoru Anar Niftəliyev məlumat yayıb.

Məsələni şərh edən AĞ Partiyanın sədri Tural Abbaslı saytımıza açıqlamasında bildirib ki, bu təfəkkürə sahib insanların idarə etdiyi sistem uğur qazana bilməz:

“Əli Həsənovun işi məhz ictimaiyyətlə əlaqələr olub. Əslində, bu, lazımi insanların lazımi yerlərdə olmadığının sübutudur. Bu adamın 60 yaşı var, yaşın da gətirdiyi bir müdriklik olmalıdır. Əli Həsənov hələ müdriklik yaşında bu işlərlə məşğuldursa, görün, qafası dünən necəymiş?! Əlində səlahiyyət olanda insanlara, mediaya, cəmiyyətə necə yanaşırmış?! Bu cür təfəkkürü olan insanların idarə etdiyi sistem uğur qazana bilərmi? Onun cavabdeh olduğu media aləminin inkişafı mümkündürmü? Qətiyyən, yox. Bu, əslində, kadr siyasətinə xüsusi diqqətli yetirməli olduğumuzu göstərir. Çünki bir çox hallarda kadrlar iqtidarın siması olur və taleyini həll edir”.

Siyasətçi Əli Həsənovun atdığı addımın utancverici olduğunu qeyd edib:

“Əli Həsənovun şəxsinə heç kim tənqid yazmır ki... Hamı onun fəaliyyətindən danışır. Bizim şəxsi ilə nə işimiz var?! Bu adamların dözümlülük dərəcəsi budursa, idarə etdikləri sistem nə olacaq?! Bu, Həsənovun zamanında təmsil etdiyi iqtidar komandası, Yeni Azərbaycan Partiyası üçün ayıbdır. Əli Həsənov belə hərəkətləri ilə həm də onları pis vəziyyətdə qoyur ki, baxın bu sistemin başında duran insanlar hansı təfəkkürdədir. Əslində, bu hərəkət mənim üçün gözlənilməz olmadı. Əminəm ki, hüquq mühafizə orqanları fəaliyyətlərini biraz da dərinləşdirsələr, o da həbs olunmalı insanlar sırasında yer alacaq və həbs olunacaq. Nə qədər çox günahkar olursansa, səsin bir o qədər hündürdən çıxır. Həsənovun davranışları da onun göstəricisidir. Cinayət psixologiyasıdır. Hər halda iqtidar yolu kimlərlə getdiyini, kimlərə məsul vəzifələr, daşıya bilməyəcəkləri öhdəliklər verdiyini bir də düşünməlidir. Ümumiyyətlə, Əli Həsənovun hələ də azadlıqda olmasını anlaya bilmirəm. Yəni mümkün deyil ki, onun tabeliyində olan insanlar korrupsiya faktı ilə həbs olunsun, amma onun özü rəhbər kimi azadlıqda gəzsin. Azərbaycan mediasına keçmiş olsun deyirəm. Arzum budur ki, bir də Azərbaycan mediası geridüşüncəli insanların ümidinə qalmaz”.