“2016-cı ilin ilk ayından bu günə qədər 18 qaraciyər köçürülməsi həyata keçirilib”.

Bu haqda AzerTaym.az-a Səhiyyə Nazirliyi Mərkəzi Neftçilər Xəstəxanasının Cərrahiyyə və orqan transplantasiyası şöbəsinin müdiri, tibb üzrə fəlsəfə doktoru Mircəlal Kazımi məlumat verib.

O bildirib ki, qaraciyər köçürülən ən kiçik xəstənin yaşı 4, ən böyüyünün yaşı isə 63 yaş olub.

M.Kazıminin sözlərinə görə, böyrək köçürülən xəstələrin sayı 38-dir:

“Bu il ərzində böyrək köçürülən 2 nəfər dünyasını dəyişib. Əməliyyatdan sonra ölən xəstələr  43 və 31 yaşlarında kişilər olub. Böyrək köçürülən ən kiçik pasiyentimiz 6 , ən böyük pasiyentimiz isə 68 yaşındadır”.

Qeyd edək ki, xəstəxanada böyrək köçürmə əməliyyatı 12 min, qaraciyər köçürməsi isə 45 min manatdır. Həkim deyib ki, qiymətlərdə heç bir dəyişiklik olmayıb.

Xatırladaq ki, 2015-ci ilin anoloji dövründə Mərkəzi Neftçilər Xəstəxanasında 76 böyrək, 14 qaraciyər köçürülməsi həyata keçirilib.