“İsrail Dövlətinin kəşfiyyat naziri Gila Gamlieli X Qlobal Bakı Forumunda iştirak etmək üçün Bakıdadır. Bundan başqa forumda İsrailin keçmiş xarici işlər və daxili işlər nazirləri də iştirak edir”.

Bu sözləri politoloq Elxan Şahinoğlu İsrail dövlətinin kəşfiyyat naziri Gila Gamlielinin Azərbaycana səfərini şərh edərkən deyib.

Onun sözlərinə görə, Azərbaycan-İsrail münasibətləri günü-gündən inkişaf edir və bu heç bir ölkəni, xüsusilə də İranı narahat etməməlidir:

“Azərbaycan müstəqil xarici və təhlükəsizlik siyasəti yürüdür. Bizim İsrail ilə münasibətlərimiz heç bir ölkəyə qarşı deyil. Bu mənada bu məsələnin başda İran olmaqla heç bir ölkəyə aidiyyəti yoxdur.

Azərbaycanın İsraildə səfirliyi də artıq fəaliyyət göstərir. Bu gün iki ölkə arasında bir çox sahədə əməkdaşlıq mövcuddur. Azərbaycan Türkiyənin Ceyhan limanı vasitəsilə İsrailə neft ixrac edir. Hansı ki, rəsmi Bakının İsrailə ixrac etdiyi neft bu ölkənin ümumi tələbatının 30-40 faizini ödəyir”.

Politoloqun sözlərinə görə, İranın Ermənistanla münasibətləri Azərbaycanı narahat etmədiyi kimi İsraillə münasibətlərimiz də rəsmi Tehranı narahat etməməlidir:

“Lakin biz bunun tam əksini görürük. İran İsrail ilə münasibətlər fonunda yenə Azərbaycanı hədələyir. İran xarici işlər nazirinin Türkiyəyə sonuncu səfəri zamanı birbaşa olmasa da dolayı yolla rəsmi Bakını hədələməsi buna misal ola bilər. İranın bu məsələdəki siyasi, təxribat xarakterli bəyanatları və ümumilikdə nə düşündüyü bizi maraqlandırmır. Azərbaycan müstəqil ölkədir və istədiyi ölkə ilə münasibətlər qura bilər”.

Son aylar İsrail rəsmilərinin Azərbaycana səfərləri intensivləşib. Bura yalnız siyasətçilər yox, hərbi, kəşfiyyat, xüsusi xidmət sahələrinin rəhbərlərinin səfərləri də daxildir. Bu, Azərbaycanın, Prezident İlham Əliyevin ən böyük uğuru kimi qiymətləndirilir. İsrail nəinki Yaxın Şərq regionunun, bütövlükdə dünyanın aparıcı dövlətidir. Dünya gücüdür. Beynəlxalq siyasətin formalaşmasında, tətbiqində aparıcı rola malik dövlətdir. Amerika Birləşmiş Ştatları kimi dünya nəhənginin ən yaxın müttəfiqidir. Beynəlxalq yəhudi lobbisi ilə də Azərbaycanın yaxşı münasibətləri var. ABŞ-dakı yəhudi konseyi ilə ölkəmizin əlaqələrinin üst səviyyəsi hər kəsə məlumdur. Həmçinin yəhudi icmalarına Azərbaycanda dövlət və xalq səviyyəsində böyük qayğı, sevgi mövcuddur. Əslində yəhudi xalqı ilə Azərbaycan xalqının mehriban dostluq münasibəti hər zaman yaxşı vəziyyətdə olub. Hər iki xalq bir-birinə hörmətlə davranıb. Hətta yaxın tarixin müəyyən mərhələsində qarşılıqlı yardımlarda bulunublar.

Bu cür humanitar və insani münasibətlər sonradan dövlətarası münasibətlərə keçib. Son illər rəsmi Təl-Əvivlə Bakının münasibətləri üst səviyyələrə qədər inkişaf edib. Azərbaycan İsraildən son model silahlar alır. İsrail silahlarının ən yaxşı tətbiqi və təcrübədən keçirildiyi dövr 44 günlük Vətən müharibəsi zamanı oldu.

İran bu əlaqələrdən ona niyə narahatdır? Çünki İsraillə arasında düşmən münasibət var. Ona görə də Azərbaycanın İsraillə yaxınlaşması Tehranı rahatsız edir. Baxmayaraq ki, Prezident İlham Əliyev dəfələrlə bəyan edib ki, o ölkəsini İrana qarşı hücumlarda heç vaxt platsdarm olmağa imkan verməyəcək. Cənab İlham Əliyev 20 ildir bu bəyanatının arxasında dayanır. Mövqeyində zərrə qədər dəyişiklik olmur. İran isə… Xain xoflu olur… (global.info)