Bakı Nəqliyyat Agentliyi (BNA) dövlət büdcəsindən ən çox vəsait qurumlardan biri olsa da, ziyanla işləyir. Reprotyor.info qurumun hesabatına əsasən xəbər verir ki, 2021-ci il yanvarın 1-nə Bakı Şəhər İcra Hakimiyyəti yanında BNA vergi öhdəlikləri 2,008 milyon manat təşkil edib.
Qurum 2018, 2019 və 2020-ci illəri də zərərlə başa vurub. BNA-nın 2019-cu il yanvarın 1-nə aktivləri 139,699 milyon manat olub ki, bu da 1 il əvvələ nisbətən 2,5 dəfə çoxdur. Hesabat dövründə Agentliyin 83 min manatlıq öhdəlikləri formalaşıb, balans kapitalı isə 2,5 dəfə artaraq 139,616 milyon manata çatıb, o cümlədən 49,068 milyon manatlıq nizamnamə kapitalı formalaşıb, ona dövlət xətti ilə qoyulmuş investisiyalar isə təxminən 2 dəfə artaraq 134,73 milyon manat olub.
BNA 2018-ci ili isə 32,156 milyon manat zərərlə başa vurub. Bununla da, Agentliyin yığılmış zərəri 3,7 dəfə artaraq 44,182 milyon manata çatıb.
Sənədə əsasən, həmin il BNA cəmi 68 min manat əməliyyat gəliri əldə edib. Agentliyin xərcləri isə 32,224 milyon manat, o cümlədən əmək haqqı və işçilərlə bağlı digər xərcləri 1,659 milyon manat, amortizasiya xərcləri 8,132 milyon manat, əməliyyat xərcləri 16,416 milyon manat, digər xərcləri isə 6,019 milyon manat təşkil edib.
Araşdırmalarımız zamanı bəlli olub ki, BNA təkcə 2021-2022-ci illərdə satınalımalara 14 960 810 manat xərcləyib.
Mediada BNA-nın keçirdiyi tenderlər barədə neqativ tonlu materiallar kifayət qədərdir. Təkcə bi satınalma müqaviləsini nümunə göstərmək kifayət edir ki, qurumun fəaliyyəti barədə təsəvvür yaransın.
Məsələn, 2020-ci ildə BNA “Alpina Parking Consulting” MMC şirkəti ilə satınalma müqaviləsi imzalayıb. Müqavilənin maliyyə dəyəri 2 milyon 100 AZN-dir. Müqavilənin şərtlərindən aydın olur ki, şirkət quruma parkinq məsələsini həll etmək üçün məsləhət verib.
Qurumun bu addımı o zaman ictimai müzakirərlərə səbəb olmuşdu. Bu məsələni isə ilk olaraq isqtisadçı ekspert Natiq Cəfərli gündəmə gətirmişdi. “Bu il Bakı Nəqliyyat Agentliyi (BNA) tərəfindən tender keçirilib, müsabiqənin qalibi “Alpina Parking Consulting” MMC şirkəti olub. Bilirsiz, bu şirkət BNA üçün nə edəcək?! Yox-yox, nə yol rəngləyəcək, nə avtobus yuyub-dezinfeksiya edəcək, nə də avtobusların təkərinə hava vuracaq – Şirkət BNA-ya məsləhət verəcək ki, şəhərdə parking məsələsini necə həll etsin.
Deyəsən, çox ağır məsləhətlər olacaq. Elmlərdə 20 ildi “parkovka” işinə baxan Həmid dayıya 100 manat versələr, bütün məsələnin kökünü, problemlərin həll yolunu BNA-ya 35 dəqiqəyə (daha tez edərdi e, sadəcə BNA tez anlamaz) izah edər”, – deyə ekspert bildirmişdi.
Biz hələ BNA-nın müqavilə imzaladığı şirkətin yeni yaranmasını qeyd etmirik. Həmin vaxt “Alpina Parking Consulting” MMC 4 ay idi ki, yaranmışdı.
Beləliklə, BNA büdcə pullarını bu sayaq göyə sovurur və hər ili zərərlə başa vurur. O zaman qurumda nədən maliyyə yoxlamaları aparılmır? Bu sualın cavabı isə açıq qalır. //Cumhuriyyet.az//