Xalq şairi Sabir Rüstəmxanlı deputat, YAP funksioneri Siyavuş Novruzovun səhhətinə yaranmış problemlərlə bağlı sosial şəbəkələrdə aparılan müzakirələrə sərt reaksiya verib.
O, özünün facebook səhifəsində keçmiş həmkarının müdafiəsinə qalxıb, onun xəstələnməsindən sevinən insanları məzəmmət edib:
"Səyavuş Novruzovun xəstəliyi ilə bağlı son günlərdə davam edən müzakirələri oxuyanda, düzü, ürəyim ağrıdı və heyrətləndim. Biz niyə bu qədər daş ürəkli, mərhəmətsiz olmuşuq? Niyə içimiz kinlə, nifrətlə dolur, sevgi hissimiz itir, ictimai əxlaqımız pozulur, hər şeyi siyasi müstəvidə görürük?
Yerlibazlıq, insanlara haralı olması meyarı ilə baxmaq ibtidai təfəkkürün nəticəsidir və milləti geri çəkən məsəlidir - bizə yaraşmaz. Hansı cəbhədə olmasından, kimliyindən asılı olmayaraq insanın xəstəliyinə sevinmək və bunu müzakirəyə çıxarmaq insanlıq deyil və Allaha xoş getməz. Bəzən xəstəliyi həkimlər də öz xəstəsindən gizlədir. Hər kəsin çevrəsi, yaxınları, ailəsi, uşağı var. Bu müzakirələrin onlara necə təsir edəcəyini düşünməmək vəhşilikdir. Siyasi opponentlik və ya tənqid üçün şəxsin xəstələnməsini gözləməzlər! Hər kəsin imkanı var, sağlam vaxtında iradını da, bəyənmədiyini də yaza bilər, ona qarşı mübarizə də apara bilər. Ancaq adam xəstələnəndən sonra buna sevinmək yaxşı iş deyil. Allah bütün xəstələrimizə şəfa versin! Səyavuşa gəlincə, onun xəstəliyi barədə heç nə bilmirəm. Kaş yalan olsun! Biz Səyavuşla ayrı siyasi cəbhələrin adamlarıyıq. Məclisdə həmişə fərqli mövqedən danışmışıq. Lakin ondan heç zaman sayğısızlıq görməmişəm. Mən də onun çıxışlarına təəccüblənməmişəm. Çünki o, bir siyasi partiyanın funksianeridir və öz vəzifəsini öz partiyadaşlarından daha ardıcıl, açıq, imkanı daxilində, sədaqətlə yerinə yetirir. Siyasətdən və məclisdən kənar Səyavuş Novruzov xeyirxah, dostluqda etibarlı, həyatın çəkinliklərindən keçib gəlmiş adamdır. Çox mütaliə edir, yaxşı ədəbiyyat həvəskarıdır. Mövqeyini açıq deyən, öz böyüklərinə və tutduğu yola bağlı olan adamdan ziyan gəlməz. Üzdə bir cür, arxada başqa cür olan adamlardan qorunmaq lazımdır.
Nifrət hədəfi Səyavuş Novruzov kimi mövqeyini bəyənmədiyimiz, lakin öz mövqeyində sabitqədəm, milli təfəkkürü yerində olan adamlar yox, Araz Əlizadə kimi bütün mahiyyəti xəyanətdən ibarət olan türk düşmənləri olmalıdır. Pəqiblə mübarizə apararkən öz gücünə arxalanmalısan. Kişi düşməninə də qəfil xəstəlik arzulamaz...”
Qeyd edək ki, Siyavuş Novruzovun arıqlamasını əks etdirən fotosu ciddi müzakirəyə səbəb olub. Sosial şəbəkələrdə onun ağır xəstəlikdən əziyyət çəkməsi bildirilib.
S.Novruzov isə mətbuata açıqlamasında arıqlmasının dieta saxlamasıyla əlaqədar olduğunu bildirib.
AzerTaym.az
