Naxçıvan gömrüyü ilə bağlı aparılan araşdırmalar davam edir. Rəsmi dövlət qurumları ilə yanaşı mediada da bu haqda yeni faktlar üzə çıxmaqdadır. Bu vaxta qədər gömrükdə problemlərlə qarşılaşan şəxslər də bu məsələni ictiailəşdirməyə maraqlı görünürlər.

Ətraflı

Naxçıvan Muxtar Respublikasından olan və adının çəkilməsini istəməyən iş adamı “Yeni Sabah”a müraciətində bildirib ki, o Türkiyədən ölkəyə mal idxal edib. 

Bildirir ki, Türkiyədən Sədərək gömrüyü vasitəsilə ilə malları Naxçıvana gətirdiyi zaman gömrükdə dövlət rüsumunun ödənişini edir. Lakin sonradan Naxçıvan şəhər gömrüyündə də malları Bakıya yola salmaq üçün ondan əlavə ödəniş tələb olunurdu:

“Düşünün, Gəncədən Bakıya mal gətirmək üçün yolda kimlərə isə əlavə ödəniş eləmək məcburiyyətindəsən. Bu sadəcə dəhşətdir.

Məcbur qalaraq əlavə ödənişi ödəyib mallarımızı Naxçıvan şəhər gömrüyündən üzü Bakıya doğru yola salırdıq.

Növbəti dayanacaqda isə bizi Biləsuvar gömrüyü qarşılayırdı. Çünki Naxçıvandan Bakıya gələn yüklər Biləsuvar gömrüyü vasitəsi ilə Bakıya daxil olur. Bu zaman isə bizi Biləsuvarın gömrükçüləri soymağa başlayırdı. 

Onlar da malların türk malı olduğu üçün bizdən küllü miqdarda ödəniş tələb edirdilər. Təsəvvür edin Azərbaycana girən mala sərhəddə ödəniş eləsək də daxildə yenidən iki dəfə ayrı-ayrı ödənişlər ödəməyə məcbur edilirdik. Dəfələrlə müxtəlif vaxtlarda Gömrük Komitəsinə şikayət eləsək də nəticə olmamışdı. 

Məcbur qalaraq mallarımız xarab olmasın və malları daşıyan sürücülərə günlərlə Biləsuvarda qalmasın deyə gömrüyün tələb etdiyi qeyri-qanunu ödənişləri verirdik. 

Halbuki qanunvericilik ilə hər hansı bir ölkədən mal gətirəndə və onun üçün müvafiq ödənişləri dövlət büdcəsinə ödədikdən sonra mal artıq yerli mal statusu alır və ölkənin bir şəhərindən digər şəhərinə daşınanda əlavə ödəniş alınmamlıdır. 

Naxçıvan şəhər və Biləsuvar gömrükçüləri isə bildirirdilər ki, mal ölkəyə girən zaman Sədərək gömrüyündə ödəniş edilməsinə baxmayaraq, onlara da ödəniş edilməlidir. Ödəniş edildikdə isə bu haqda heç bir qəbz verilmirdi”.