Müasir dövrdə narkomaniya bütün dünyada narahatlıq doğuran qlobal problem kimi bəşəriyyətin qarşısında durur. Təəssüf ki, “Ağ ölüm” təhlükəsi ölkəmizdən də yan keçməyib. Ekspertlər artıq həyəcan təbili çalırlar. 

Respublika Narkoloji Mərkəzinin açıqladığı son statistikada 2022-ci ildə narkotik vasitə istifadəçilərin sayının ölkə üzrə 35 min 97 nəfər olduğu bildirilir.  

Statistikaya görə, narkotik vasitədən istifadə edən 11-17 yaş aralığında şəxslər də var.

Mövzu ilə bağlı danışan Xalq artisti, rejissor, aktyor Şeyx Əbdül Mahmudbəyov bildirib ki, bu bəlanın qarşısının alınmasında məktəblərin də böyük rolu var:

“Azyaşlı uşaqların narkomaniyaya qurşanması müəllim, məktəb məsələsini də gündəmə gətirir. Məktəb haqqında yeni qanun qəbul edilməlidir, təhsil naziri, məktəblər əməlli-başlı ələnməlidir. Müəllimlərə səlahiyyət verilməlidir. Bu gün məktəbdə müəllim şagirdə söz deyə bilmir. Belə şəraitdə hansı qayda-qanun, hörmət ola bilər? Müəllim toxunulmaz şəxs elan edilməlidir. Məktəbə, müəllimə müdaxilə edən vəzifəli adamlar da ifşa olunmalı, rüsvay edilməlidir. Dövlət səviyyəsində narkomaniyaya qarşı həm daxildə, həm xaricdə mübarizə aparmaq lazımdır. Müəllimlər məktəbdə söz sahibi olmalıdır”. 

Rejissorun sözlərinə görə məktəbli uşaqların narkomaniyaya qurşanmaması üçün hər kəs, xüsusilə valideynlər məsuliyyətli və diqqətli olmalıdırlar: 

“Niyə valideynlər ildə bir dəfə də olsun məktəbə gəlmirlər, övladları ilə maraqlanmırlar? Əvvəllər bizim valideynlərimiz hər ay məktəbə iclasa çağırılırdı, hesabat verilirdi. Məktəbin həyətində qışqırsaq, səsimizi qaldırsaq səhər valideynimiz məktəbə çağırılırdı. İndi isə nə valideyn, nə şagird müəllimi adam yerinə qoymur. Şagird sinfə “Lexus”da, mühafizəçi ilə gəlir, müəllim də cırıq paltarı, şalvarı ilə metroda, avtobusda sürtünə-sürtünə işə gəlir”. \Yenisabah.az