AZTV SƏDRİNƏ sui-qəsdlə bağlı yeni xəbər: icra başçısı TORPAQ VERİB
24-11-202423-11-202422-11-2024
AZTV sədri Arif Alışanov və onun ailə üzvlərinə qarşı sui-qəsddə təqsirləndirilən Şücaət Əkbərov, Qoçalı Cəbiyevin, Zöhrab Şirinovun, Aqşin Hüseynovun cinayət işi üzrə məhkəmə davam edib.
Lent.az-ın məlumatına görə, Bakı Ağır Cinayətlər Məhkəməsində hakim Əfqan Hacıyevin sədrliyi ilə keçirilən prosesdə şahid qismində Rövşən Eynalov ifadə verib.
Şahid qeyd edib ki, təqsirləndirilən şəxslərdən Zöhrab Şirinovun bacısı oğludur. O bildirib ki, hadisə günü avtomobili Şamaxı Rayon Polis İdarəsinə gətirib: "Lakin maşının kimə məxsus olduğunu bilmirəm".
Daha sonra Ülvi Mirzəyev ifadə verib və deyib ki, Samuxda Şücaət Əkbərovun qızı üçün ev alıb: "Şücaət əmi pulu göndərirdi. Demişdi qızı Cəmilə üçün ev tikdirim. Evin tikintisinə ümumilikdə 80 min manat xərclənib. Pulu bəzən Ələddin əmi də verirdi. Pullar usta və materiallara xərclənib. Torpaq sahəsinin sənədləri olub. İcra başçısı Alı Qocayevhəmin torpağı Şücaətin qızı Cəmiləyə hədiyyə edib. Ev tikildi qutardı, orda heç kim yaşamır. Mən nəzarət edirdim".
Təqsirləndirilən şəxs Şücaət Əkbərov deyib ki, Gəncəyə hər gələndə icra başçısı Alı Qocayevlə görüşüb: "Hər o tərəfə gedəndə mütləq Alı Qocayevlə görüşmüşən. Həmin ev isə bizim deyil".
Şahid Qismət Abışov bildirib ki, traktor almaq üçün Arif Alışanov tərəfindən pul ödənilib: "İki traktor alındı. Onun pullarını Arif müəllimin bacısı oğlu Dəyanət aldı".
Şücaət Əkbərov isə bildirib ki, adına olan traktoru özü öz pulu ilə alıb.
Şamaxı rayon Mədrəsə kəndinin bələdiyyə sədri Asim Bayramov şahid kimi ifadəsində qeyd edib ki, şəxsi 12 sot torpağını Şücaət Əkbərova 5 min manata satıb.
Zərərçəkən Dəyanət Cəfərov qeyd edib ki, Şücaət Əkbərov Mədrəsə kəndində 50 hektar torpaq sahəsini 80 hektar adı ilə satmaq istəyib.
Şücaət Əkbərov isə buna etiraz edib: "Həmin torpaq camaatındır. Onu ala bilməzdik".
Prosesdə fasilə elan edilib.
Qeyd edək ki, ittihama görə, Ş.Əkbərov 2013-cü ilin iyul ayından 2017-ci ilin yanvarınadək Şamaxı rayonunda və Baki şəhərində külli miqdarda özgə əmlakını aldatma və etibardan sui-istifadə yolu ilə ələ keçirmək məqsədilə dələduzluq edərək mütəşəkkil dəstə yaradıb, qanunsuz olaraq silah, döyüş sursat əldə edib, sifarişlə iki və daha çox şəxsi qəsdən öldürməyə cəhd edib. O, A.Alışanovun 4 milyon 641 min 696 manatlıq əmlakını ələ keçirmək istəyib.
S.Əkbərov yaxın münasibətlərdə olduğu Musabi Namazov, Qoçali Cəbiyev , onun vasitəsi ilə isə Zöhrab Şirinov ilə A.Alışanovu öldürmək barədə razılığa gəlib, cinayət planını hazırlayıb və mütəşəkkil dəstəyə rəhbərlik edib. Bunun müqabilində dəstə üzvləri Q.Cəbiyevlə M.Namazova 600 min manat pul verəcəyini vəd edib.
2016-cı ilin dekabr ayının 13-də Şamaxı rayonunun Mədrəsə qəsəbəsindəki evinə gələcəyini qabaqcadan bildiyi A.Alışanovu, onun qızı Nigar Alışanovanı və sürücüsü Hacı Babayevi öldürməsini sifariş verib.
Lakin sonradan dəstə üzvü M.Namazov bu cinayətdən könüllü olaraq imtina edib.
Ş.Əkbərov 2016-cı ilin dekabr aylarında A.Alışanovu qəsdən öldürmək məqsədilə başqa şəxs tapmaq barədə dəstə üzvü Q.Cəbiyevə yenidən tapşırıq verib. Q.Cəbiyev əvvəllər məhkum olunmuş, tanışı Z.Şirinovla cinayəti törətmək məqsədi ilə 100 min manat qarşılığında razılığa gəlib. Bir qədər sonra A.Alışanovun, onun bacısı oğlu Dəyanət Cəfərovun içərisində olduğu "Toyota land Cruiser” markalı 99-AA- 400 dövlət nömrə nişanlı avtomaşını Çuxuryurd- Şamaxı şossesi yolunda hərəkətdə olarkən yüksək sürətdə vuraraq hündürlükdən dərəyə salmaq barədə plan hazırlanıb.
Q.Cəbiyev telefonla Z.Şirinova zəng edib, cinayətin törədiləcək vaxtı, A.Alışanovun içərisində olacağı avtomaşını markası, rəngi, dövlət nömrə nişanlı barədə məlumatlandırıb.
Lakin A.Alışanov gözlənilmədən öz avtomaşınına deyil, VAZ 21214 "NİVA” markalı, 10-LR-099 dövlət nömrə nişanlı avtomaşına əyləşib və Ş.Əkbərov bu barədə dəstə üzvləri Q.Cəbiyev və Z.Şirinovu xəbərdan etməyə imkan tapmayıb.
Plana əsasən, Q.Cəbiyev Çuxuryurd kəndindən keçib Şamaxı şəhərinə doğru hərəkət edən "Toyota Land Cruiser” markalı avtomaşını özünün idarə etdiyi VAZ 21214 "NİVA” markalı avtomaşınla bir neçə dəfə arxa sol və orta hissəsindən vuraraq yüksəklikdən dərəyə salmağa çalışsa da, buna nail ola bilməyərək idarəetməni itirib.
S.Əkbərov qəsdən adam öldürmə cinayətinin icrası üçün qrup üzvlərinə vəd etdiyi 100 min manat pulun bir hissəsini Z.Şirinova verib. Təqsirləndirilən şəxs 2017-ci ilin yanvar ayının 11-də növbəti dəfə A.Alışanovu Şamaxı rayonunda odlu silahdan istifadə etməklə qəsdən öldürmək qərarına gəlib.
Lakin yenə planları baş tutmayıb. Ş.Əkbərov sürücüsü Aqşin Hüseynov və mütəşəkkil dəstənin üzvü Q.Cəbiyev vasitəsilə avtomat silahı Z.Şirinovdan geri alaraq, yenidən A.Alışanovla Şamaxı rayonunun ərazisində görüşəcəkləri barədə razılığa gəlib. Həmin gün Şamaxı rayonunun Mədrəsə qəsəbəsində yerləşən su hovuzuna baxmağa apararkən odlu silahlardan atəşlər açmaqla qəsdən öldürmək barədə dəstə üzvləri Q.Cəbiyev, M.Namazov və Z.Şirinovu təlimatlandırıb.
M.Namazov dəstə üzvləri tərəfindən törədiləcək qəsdən adam öldürmə və qanunsuz silah əldə etmə daşıma, gəzdirməklə saxlama əməlləri barədə polis orqanlarına vaxtında məlumat verib. Polis əməkdaşları Ş.Əkbərovu, Q.Cəbiyevi, A.Hüseynovu və Z.Şirinovu saxlayıb.
Məhkəmənin qərarı ilə Ş.Əkbərov, Q.Cəbiyev, A.Hüseynov və Z.Şirinovun barəsində həbs qətimkan tədbiri seçilib.
Fikirlər
-
Reklam
-
Əsas xəbərlər
