Türkiyənin keçmiş prezidenti Abdullah Gül və sabiq baş nazir Əhməd Davudoğlu həbs oluna bilər.

Publika.az xəbər verir ki, bunu Türkiyə Dəniz Donanmasının sabiq rəhbəri Özdən Örnək “Sözçü” nəşrinə müsahibəsində deyib.

“ABŞ 1980-ci illərdən bəri Güləndən istifadə edir. “Üst ağıl” dedikləri ABŞ Mərkəzi Kəşfiyyat İdarəsidir. Hər tərəfdə yerləşdilər. Sağı da, solu da bunu bildikləri halda görməməzlikdən gəldilər. Gül və Davudoğlu mühakimə olunarsa, təəccüblənmərəm. Məncə mühakimə olunmalıdırlar. AKP 2001-ci ildə quruldu, 2002-ci ildə növbədənkənar seçkilər keçirildi. AKP bu seçkilərə hazır deyildi, əlində pul, heyət və dövlət bürokratiyası yox idi. Baxdılar ki, Güləndə bunların hamısı var və buna görə də əməkdaşlıq etdilər. O zamandan bəri əslində, bir kresloda iki adam otururdu və bu iş ortaqlıq pozulana qədər davam etdi”, - o, deyib.

 Özdən Örnək Fəthullah Gülənin 1980-ci illərdən bəri bir iqtidar ehtirasının olduğunu bildirib.