Sabiq nazirin məhkəməsinin qapalı, yoxsa açıq olacağı ilə bağlı müəmmalar var

Aprelin 7-də Qaradağ Rayon Məhkəməsində sabiq səhiyyə naziri Əli İnsanovun məhkəməsi başlayacaq. Hakim Rəşad Mustafayevin sədrliyi ilə keçiriləcək prosesin başlayacağı saat bilinmir, amma bununla belə, əldə etdiyimiz məlumata görə, məhkəmə günün birinci yarısında baş tutacaq.

Prosesdə ölkənin hüquq müdafiəçilərinin də iştirakı gözlənilir. Bununla bağlı günlər öncə İnsan Haqları üzrə Birgə İşçi qrupunun üzvü Səidə Qocamanlı “Yeni Müsavat”a məlumat vermiş, məhkəmədə monitorinq aparacaqlarını bildirmişdi.

Sabiq nazirin məhkəməsinin qapalı və ya açıq olacağı ilə bağlı müəmmalar var. Onun ilk məhkumluğu ilə bağlı keçirilən məhkəmə proseslərində hakimiyyətin ünvanına səsləndirdiyi sərt tənqidləri bu dəfə də dilə gətirəcəyi və bunun üçün prosesin qapalı olma ehtimalları yüksək dəyərləndirilir. Onun vəkili Toğrul Babayev “Yeni Müsavat”a açıqlamasında Qaradağ Rayon Məhkəməsində “şüşə qəfəs”in olmadığını bildirib. Bunun üçün də Ə.İnsanovun “qəfəs”ə salınmayacağı, əvəzində məhkəməsinin qapalı olacağı iddia edilir. Hər şey məhkəmənin bugünkü ilkin hazırlıq iclasından sonra məlum olacaq.

Budəfəki məhkəmə prosesi ilə bağlı gözləntilər böyükdür. Sabiq nazirin uzunmüddətli həbsə göndərilməyəcəyi, ya az cəza alacağı, ya da məhkəmə zalından şərti və ya “ev dustaqlığı”na buraxıla biləcəyi ehtimal olunur. 71 yaşlı məhbusun həbsdə qalmasında hakimiyyətin də maraqlı olmadığı qeyd olunur.

Ə.İnsanovun həmyerlisi, Qərbi Azərbaycandan olan Böyük Azərbaycan Partiyasının sədri Elşad Musayev məhkəmə prosesində iştirak edəcəyini söylədi: “Hələ ilkin hazırlıq iclası keçiriləcək. Hesab edirəm ki, bu məsələ cəmiyyətin diqqətində olmalıdır. Siyasi çevrənin də bu məsələ diqqətindədir. Məhkəmə proseslərində sona qədər iştirak etmək niyyətindəyəm. Bu məzhəkənin hakimiyyət üçün sona çatdırılması qaçılmazdır. Bu cür addımlarla heç nəyə nail olmaq olmaz. Bu məhkəmə hakimiyyətin nüfuzunu aşağı salır. Açığı, İnsanova hakimiyyət tərəfdən güzəşt də gözləmirəm. Onu dəstəkləməyə davam edəcəyik. Bir məsələ dəqiqdir ki, iqtidar Əli İnsanovun danışmasını istəmir. Çünki o hər danışdıqca, yeni məsələlər ortaya çıxır. Ona görə hakimiyyət hər vəchlə onun danışmasına mane olur. Vəziyyəti hadisələrin gedişi göstərəcək. Məhkəmə olmadığına görə proses barədə indidən nəsə demək çətindir. Məhkəmədən sonra ətraflı məlumat verəcəm”.

“İrəvan” Azadlıq Təşkilatının sədri Təbriz Musayev məhkəmənin qeyri-obyektiv keçiriləcəyini qeyd etdi: “Təsəvvür edin ki, məhkəmənin vaxtı ilə bağlı onun ailə üzvlərinə belə məlumat verilməyib. Aldığım məlumata görə, günün birinci yarısında hazırlıq iclası başlayacaq. Ədalətli məhkəmə Azərbaycanda olmadığına görə İnsanovla bağlı prosesdən ədalət gözləmirəm. İstənilən halda məhkəmədə iştirak etməyi düşünürəm. Əli İnsanov aldığı cəzanı günə-gün çəkməsinə baxmayaraq, qondarma ittihamlarla 6 aydır həbsdədir. İndiyə qədər İnsanovla bağlı cərəyan edən hadisələr onu göstərir ki, yenə də onunla bağlı ədalətsiz qərar veriləcək. Məhkəmənin açıq və ya qapalı olması barədə də məlumatsızıq. Hazırlıq məhkəməsində yəqin ki, hər şey məlum olar. Prosesin gedişindən asılı olaraq, təşkilatımız adından onun müdafiəsi ilə bağlı bir sıra işlər görməyi düşünürük. Hansı səviyyədə məhkəmənin aparılmasından çox şey asılıdır”.

Məlumat üçün bildirək ki, Ə.İnsanov 2005-ci ilin oktyabr ayında həbs edilib. O, dövlət vəsaitlərinin mənimsənilməsində və dövlət aktivlərinin qanunsuz özəlləşdirilməsinin təşkilində ittiham olunub. 2007-ci ilin aprel ayında Ə.İnsanov Bakı Ağır Cinayətlər Məhkəməsinin hökmü ilə əmlakı müsadirə olunmaqla və 3 il ərzində dövlət vəzifəsi tutması qadağan edilməklə, 11 il müddətinə azadlıqdan məhrum edilib. Avropa İnsan Haqları Məhkəməsinin 2013-cü ildə sabiq nazirin azadlığa buraxılması ilə bağlı qərarı olsa da, o, əsas cəzasını son günə qədər çəkib.

Ötən ilin avqustunda azad olunmasına iki ay qalmış İnsanov barəsində Cinayət Məcəlləsinin 234.1 (satış məqsədi olmadan qanunsuz olaraq narkotik vasitələri və ya psixotrop maddələri şəxsi istehlak miqdarından artıq miqdarda əldə etmə və ya saxlama), 315.2 (hakimiyyət nümayəndəsinə xidməti vəzifələrini yerinə yetirərkən həyat və sağlamlıq üçün təhlükəli olmayan zor tətbiq etməklə müqavimət göstərmə, xidməti vəzifələrini yerinə yetirməsi ilə əlaqədar ona və ya onun yaxın qohumlarına qarşı belə zor tətbiq etmə və ya zor tətbiq etmə hədəsi ilə hədələmə, bu maddədə göstərilən şəxslərə qarşı həyat və sağlamlıq üçün təhlükəli olan zor tətbiq etmə) və 317-2.1-ci (cəzaçəkmə müəssisələrində və ya istintaq təcridxanalarında saxlanılan şəxs tərəfindən qadağan olunmuş əşyaların hazırlanması, saxlanılması, gəzdirilməsi, daşınması və ya istifadəsi, eyni əməllər təkrar törədildikdə) maddələri ilə cinayət işi başlanıb. 11 illik əsas cəzasının başa çatdığı ötən ilin oktyabrında barəsində həbs-qətimkan qərarı seçilib. İndiyə qədər həbs-qətimkan qərarının müddəti bir neçə dəfə uzadılıb. Ona qarşı irəli sürülmüş üç maddə üzrə İnsanovu 7 il cəza gözləyir.