Bütöv Azərbaycan Xalq Cəbhəsi Partiyasının (BAXCP) sədri, Milli Məclisin Dövlət quruculuğu və hüquq siyasəti komitəsi sədrinin müavini Qüdrət Həsənquliyevin müsahibəsini təqdim edirik:

- Qüdrət bəy, bəziləri belə iddia edirlər ki, həm biz, həm də ermənilər “dirijor çubuğu” ilə idarə olunuruq. Bu iddialar nə dərəcədə əsaslıdır?

- Bu iddialar cəfəngiyyatdır və insanların öz dövlətinə inamını sarsıtmağa hesablanıb. Atəşkəsin bərpa olunmasından, içi mən qarışıq, bəzi insanlar narazı qalıb. İnsanların bu psixoloji durumundan və karantin rejiminin onlar üçün yaratdığı auditoriyadan istifadə edib belə cəfəng fikirlər yayırlar. Ali Baş Komandan ordunun vəziyyətini, beynəlxalq və regional durumu hamıdan yaxşı bilir. Atəşkəsin pozulmasından bir az öncə, o, bəyan etmişdi ki, torpaqlarımızı azad etmək üçün, biz, daha güclü olmalı, əlverişli bəynəlxalq şəraitin yaranmasını gözləməli və bunun üçün çalışmalıyıq. Daha güclü olmamız üçün isə Prezidentə iqtisadiyyatda və orduda islahatlar həyata keçirməyə zaman lazımdır.

Hər qanlı toqquşmadan sonra regionda marağı olan dövlətlər yaranmış vəziyyətdən maksimum yararlanmağa çalışırlar. Necə ki, aprel savaşından sonra Qərbə meyllənmiş Ermənistanın Baş naziri Sarkisyan devrildi. Əgər 12 iyul toqquşmasından sonra Paşinyan da devriləcəksə, bunun bizə xeyri var ki, ziyanı yoxdur. 1993-cü ilin iyununda ermənilər Azərbaycanda baş vermiş dövlət çevrilişindən istifadə edib BMT-yə, dünya birliyinə, beynəlxalq hüquqa tüpürərək heç kimə məhəl qoymadan Qarabağ ətrafındakı rayonlarımızı işğal etdilər. Biz isə Ermənistanda baş verənlərdən istifadə edərək beynəlxalq hüququn aliliyini bərpa etməli, Qarabağı azad etməliyik. Bizim son döyüşdə canlı qüvvədə ermənilərdən daha çox itki verməyimiz barədə iddialara gəldikdə isə, bu, hətta həqiqət olsa da belə, bizi qorxutmamalıdır. İtkilərimiz nə qədər üzücü və iddia olunduğu kimi ermənilərdən çox olsa belə, bizi sarsıtmamalıdır. SSRİ İkinci Dünya Müharibəsində qalib gəlsə də, məğlub etdiyi faşist Almaniyasından az qala 3 dəfə çox itki vermişdi. Bizim hərbçilər Vətən uğrunda şəhid olurlar,ermənilər isə işğalçı ordunun əsgərləri kimi ölürlər. Çalışmalıyıq ki, işğalçı ordunun daha çox əsgərini öldürək. Bu zaman Ermənistanda sülh istəyənlərin sayı artacaq, onların işğalçı ordusu demoralizasiya olacaq. Çünki başa düşürlər ki, nəyin üstündə ölürlər. Böyük müharibəyə başlaya bilməsək də, ermənilərin təxribatları bizi sevindirməlidir, çünki bu, işğalçı ordunun əsgərlərini öldürmək üçün bizə imkan yaradır.

- Qüdrət bəy, sizcə, niyə ermənilərə daha sarsıdıcı zərbə endirib, heç olmasa Qarabağ ətrafındakı rayonlarımızı azad edə bilmirik?

- Etiraf etməliyik ki, ermənilər müasir silahlarla təchiz olunub, geniş kəşfiyyat məlumatları ilə təmin olunurlar. Müasir silahlardan peşəkarcasına istifadə edə bilirlər. Onların aprel savaşından ciddi nəticələr çıxardığı ortadadır. Düşməni bir heç saymaqla ona qalib gəlmək olmaz. Əksinə, ona olduğundan artıq qiymət verməlisən ki, döyüşə daha yaxşı hazırlaşasan. Mən dəfələrlə məsələ qaldırmışam ki, biz peşəkar ordu qurmalı və hərbi təlimlər real döyüş vəziyyətinə yaxın şəraitdə keçirilməlidir. Həmin təlimləri deputatların, jurnalistlərin, QHT nümayəndələrinin izləməsinə şərait yaradılmalıdır. Həm də xalqımız üçün bir şey qaranlıq olaraq qalır ki, niyə ermənilər hansı silahlarla hücum edirlərsə, biz də həmin silahlarla onlara cavab verməliyik? Niyə ermənilərin bizim daha güclü silahlardan istifadə etdiyimizə dair iddilarını dərhal təkzib etməyə çalışırıq? Axı bizim döyüşdə hansı silahdan istifadə edəcəyimizə dair ermənilər qarşısında hər hansı öhdəliyimiz yoxdur...

- Könüllülərin səfərbərlik üçün hərbi komissarlıqlara kütləvi müraciətlərinə necə baxırsınız?

- Onların hər biri ən böyük hörmətə və ehtirama layiqdir. Onların çoxu başa düşür ki, döyüşün taleyini müasir silahlar - radarların izləyə bilmədiyi döyüş təyyarələri, dronlar, raketlər və ondan bacarıqla istifadə etməyi bacaran peşəkar hərbçilər həll edir. Son döyüşlərdə neçə hərbçimiz adi silahdan açılan atəşlə qətlə yetirilib? Ona görə bir daha təkrar edirəm ki, peşəkar ordu qurmalıyıq. Həmin insanlar orduya yazılmaqla torpaqlarımızın azad olunmasını istədiklərini bəyan edirlər.

"AzerTaym.az"