TALIŞ kəndi uğrunda vuruşan KOMANDİRİN EVİNİ SÖKDÜLƏR...
23-11-202422-11-202421-11-2024
"Bu ayın əvvəli İcra Hakimiyyətindən gəlib tələb etdilər ki, tikintini dayandıraq. Mən bildirdim ki, 2 ildir burda tikinti gedir, tikintiyə razılıq olmasaydı, daşı daş üstünə qoya bilməzdik. İndi ev hazır olub, niyə dayandıraq ki?"
Avropa.info xəbər verir ki, Azadlıq Radiosu Ramanadakı evi sökülən sakinlərə baş çəkib.
"Mənim də evimi söküblər. Özləri icazə vermişdilər, gözlədilər, tikdim, üstünü örtdüm, 3 ilə tikdiyim evi traktorları töküb 15 dəqiqədə şumladılar. Mənə çox pis təsir etdi. Ancaq iki gündən sonra eşidəndə ki, məndən bir az o tərəfə Qarabağda döyüşən bir hərbçinin də evini söküblər, ağladım. Öz dərdimi unutdum. O kişi həmin vaxt Talış kəndi uğrunda vuruşurdu, kəndi alandan sonra xəbər tutmuşdu ki, Ramanadakı evi sökülüb".
Təəssüflə danışan Murad Daşdəmirovdur. Sökülmüş 4 otaqlı evinə görə köks ötürməyə macal tapmamış aprelin əvvəlində qonşuluqdakı bir növbəti söküntü onu möhkəm sarsıdıb. Səbəbsə sökülən evin sahibinin həmin vaxt Dağlıq Qarabağda qızışan döyüşlərdə olması imiş.
"2 min 500 manat ver"
Ramanada yeni yaşayış massivində Sabunçu rayon icra hakimiyyətinin işçiləri onlarla evi söküblər. Bu evlərdən biri tank komandiri Cavid Çobanovun olub. Hərbçi özü döyüş bölgəsində olduğundan evin tikinti işləri ilə qardaşı Coşğun Çobanov məşğul olurmuş.
Coşğun baş verənlərdən həyəcanla danışır:
"Adamlar ön cəbhədə torpağı ermənidən birtəhər qorumağa çalışır, vay o gündən arxa cəbhədə torpağına məmur girə, onlarla bacarmaq mümkün deyil. Mən qardaşım üçün o evin tikintisi ilə 2013-cü ildən məşğul olurdum. Arada imkansızlıqdan tikinti işlərini dayandırdıq. Sonra yenə davam etməyə başladıq. Ev hazır idi. Bu ayın əvvəli icra hakimiyyətindən gəlib tələb etdilər ki, tikintini dayandıraq. Mən bildirdim ki, "2 ildir burda tikinti gedir, tikintiyə razılıq olmasaydı, daşı daş üstünə qoya bilməzdik. İndi ev hazır olub, niyə dayandıraq ki?" Təklif elədilər ki, "gedək icra hakimiyyətinə, Fərid müəllimə 2 min 500 manat ver, gəl işini davam elə”.
"İnanmadim sökərlər"
Təklif qəbul olunmayıb. Coşğun Çobanovun deməsinə görə, qurumun işçilərinin gedərkən «zəhmət çəkmə, bir azdan gəlib sökəcəklər» deməsinə inanmayıb:
"Dedim, "a kişilər, bu evin sahibi bu dəqiqə cəbhə xəttində döyüşdə can qoyur. Adamın uzun illərdir qalmağa yeri yoxdur, ümid edir ki, odun-alovun içindən tikdirdiyi evinə qayıdacaq. Necə yəni sökürük?" Qardaşım cəbhə xəttində olduğundan onunla heç cür əlaqə saxlaya bilmədim. Düzü, evi sökəcəklərinə inanmırdım".
Ancaq bu baş verib. Ağır texnika gəlib və evi söküb:
"Həmin Fərid adlı şəxs başının dəstəsi ilə gəldi, traktorlar da gətirmişdilər. Dedim, "heç olmasa bunu indi etməyin, imkan verin, ara sakitləşsin, qardaşım qayıdıb gəlsin, özü ilə məsləhətləşin". Dedilər, "ya 2 min 500 manat, ya da sökülür"”.
"Niyə göz yumulub"
Sabunçunun icra hakimiyyətindən "Qaynar xətt"ə bildiriblər ki, sökülən evlər kənd təsərrüfatı təyinatlı torpaqlarda tikilibmiş. Ancaq «saysız-hesabsız evlərin tikintisinə qurum bu günədək niyə göz yumub», bu suala cavab tapılmadı. Qurumdan Coşğun Çobanovdan rüşvət istənildiyini də təkzib ediblər: «Qanun hamı üçün qanundur. Hərbçi də, həkim də, müəllim də - hamımız qanun qarşısında bərabərik».
Qurumdan deyiblər ki, onlar üstü bağlı ev yox, yarımtikili söküblər.
Söküntü aparılan ərazidə torpaqlar, doğrudan da, kənd təsərrüfatı təyinatlıdır, torpaqları alan vətəndaşlara Daşınmaz Əmlakın Dövlət Reyester Xidməti tərəfindən 99 illik müqavilə əsasında Çıxarışlar verilib. Ərazidə sökülməyən və söküntüsü gözlənilməyən yüzlərlə ev var ki, onlar da eyni təyinatlı torpaqlar üzərində tikilib.
Fikirlər
-
Reklam
-
Əsas xəbərlər
