Bu gün “Qarabağ”ın 10-cu dəfə Azərbaycan çempionu olması münasibəti ilə "Xəyal adaları"nda tədbir keçirilir.

"AzerTaym.az" Ağdam klubunun  prezidenti Tahir Gözəlin Fanat.Az-a müsahibəsini təqdim edir. 

- 10-cü çempionluq Azərbaycanda bir ilkdir. Bu, bizi çox sevindirir. Hiss edirəm ki, hər birimizdə bayram sevinci var. Bir klubun ardıcıl 1-2 il çempion olması ayrı bir uğurdur, amma 10 dəfə çempion olması onu göstərir ki, bu klubda dərin qələbə əzmi, birlik var. Bu hal bizi çox sevindirir. "Qarabağ"ın loqosunda bir ulduz var. Çünki UEFA-da hər beş ildən bir 1 ulduz verir. Artıq bizim loqomuz dəyişəcək və orda 2 ulduz olacaq. Bu, böyük bir nailiyyətdir. Bu gün biz zəfərimizi tam başka ruhla qeyd edirik. Çünki qələbəni azad Azərbaycanda qeyd edirik. Bu uğuru bizə belə xoşbəxtliyi yaşadan cənab prezidentimiz İlham Əliyevə, şəhidlərimizə həsr edirəm. 

- Komanda sizə ikinci uğuru verdi, siz komandaya ikinci büdcəni ayıracaqsınızmı? 
- Klubun prezidenti olaraq məni komandanın sadəcə gələn il yox, uzun müddətli uğurları maraqlandırır. Hesab edirəm ki, "Qarabağ"a ən böyük hədiyyə akademiya qurulmasıdır. 2 il öncə mətbuata açıqlamamda demişdim ki, artıq gənclərə investisiya ayırmağın vaxtı gəlib. Allaha şükürlər olsun ki, bu yöndə işlər başlayıb. İnşallah, yavaş-yavaş akademiyamızı tikəcəyik. 

- Yeri müəyyınləşib?
- Yer müəyyənləşib. Ancaq mənim könlümdən keçir ki, stadionumuzun yanında olsa, daha yaxşıolar. Vahid "Qarabağ" ruhunun yaranması üçün çox önəmlidir. Biz yenə də çalışacağıq ki, bugünkü stadionumuzun yanında olsun. Cənab prezidentimiz və nazirlərimizdən xahiş edəcəyik. Amma hələ ki, Binə qəsəbəsində tikiləcək. Biraz yeri uzaqdır. İdeal yer olduğunu deyə bilmərəm, ancaq hələ də baxırıq, sahələrimizi lahiyələndiririk. Güman edirəm ki, bu il inşallah inşaata başlayacağıq. Bu, prezident olaraq mənim üçün atılan ən vacib addımlardan biri olacaq. 

- Ağdamla bağlı plan varmı? 
- Avropada oynayan klubun əsası Bakıda yerləşir. Ancaq cənab prezidentimizin verdiyi göstərişlə Qarabağda stadionlar tikiləcək. Bu, vaxt aparan işdir. Doğru zamanda oyunlarımızı orada keçirməyə şad olarıq. Bizim üçün də fəxr olar. Amma mən hesab edirəm ki, "Qarabağ" klubu infrastukturunu Bakıda qoyub, əsas yerini Bakıda inkişaf etdirməlidir. Vacib oyunlarımızı isə Qarabağda keçirmək bizim üçün şərəf olar. 

“Qarabağ” artıq ulduz yetişdirən klubdur. Büdcəmiz çatan ən yaxşı cavan, istedadlı futbolçular seçiləcək. Onlarla birlikdə yenə Avropada önəmli yerlərdə qərarlaşacağıq. Uğurlu ilimiz oldu. Klubdan növbəti mövsüm daha uğurlu çıxış gözləyirəm. Bunun üçün önlərində heç bir əngəl yoxdur.