Müsavat Partiyasının keçmiş başqanı İsa Qəmbər və hazırkı  başqan Arif Hacılının sürücülərinin partiyanın ali nəzarət orqanına - Mərkəzi Nəzarət Təftiş Komissiyasına üzv seçildiyi iddia edilir.

“AzerTaym.az" bildirir ki, bu barədə partiyanın üzvü Alya Yaqublu sosial şəbəkədə məlumat yayıb. 

O bildirib ki, İsa Qəmbərin sürücüsü digərlərindən az səs aldığı üçün əsas heyətə düşməyib, hər hansı səbəbdən yer boşalsa, o yerə keçəcək: “Amma bu, məsələnin mahiyyətini dəyişmir. İsa Qəmbərin sürücüsünü də MNTK üzvü etmək istəyiblər. Bunu rəqiblərini çıxdaş eləmək, partiyanın ali nəzarət orqanının tərkibini öz tərəfdarlarıdan təşkil etmək üçün ediblər. Əvvəlki tərkibdə rəhbərliyin göstərişlərinə əməl etməyib qanunsuz qərarların təsdiqinə etiraz eləyən bir-iki nəfər vardı, bu dəfə heç bir başağrısına yer qoymayıblar”

Onun sözlərinə görə, MNTK siyasi partiyanın ən vacib qurumlarında biri, hətta birincisidir: “Partiyada qəbul edilən qərarlara qiymət vermək, onları təsdiq və ya ləğv etmək hüququ var. Məsələn, partiya üzvü haqsız şəkildə cəzalandırılanda və ya partiyadan çıxarılanda MNTK-ya müraciət edib haqqını bərpa eləyə bilər. Müsavat MNTK-sının indiki tərkibi tamamən Arif Hacılı tərəfdarlarından ibarətdir”.

 Qeyd edək ki, partiya başqanlığına namizəd olmuş Tofiq Yaqublu isə səsvermə nəticələrinə görə, Məclis üzvü seçilməyib.