"Batabat" MMC (VÖEN-0200004821) ləğv olunduğunu elan edib.
   Açıqlanan rəsmi məlumatlarda bildirilir ki, "Batabat" MMC-nin ləğv olunması ilə bağlı elanda kreditorlardan iki ay ərzində tələblərini Bakı şəhəri, Yasamal rayonu, Zahid Xəlilov küçəsi, ev 60, mənzil 23/24 ünvanına bildirmələri istənilir.   

Məlumat üçün bildirək ki, nizamnamə kapitalı 20 manat olan "Batabat" MMC 28.07.2003-cü il tarixində dövlət qeydiyyatına alınıb. MMC-nin qanuni təmsilçisi Abdullayev Həsən Məmməd oğludur. Rəsmi məlumatlarda şirkətin hüquqi ünvanı göstərilməyib.
“Batabat” MMC barəsində açıq internet resurslarında geniş məlumat mövcud deyil. Yalnız ötən il MMC-nin adı mətbuatda yer alıb. “Batabat”ın adı Ağsu rayonunun Bico kəndində yerləşən 200 hektarlıq torpaq qalmaqalında çəkilir. Bir qrup kənd sakini iddia edir ki, bələdiyyə onlara məxsus torpağı qanunsuz şəkildə “Batabat” MMC-yə icarəyə verib.
Onu da bildirək ki, ötən ay MMC elan verərək bəyan etmişdi ki, Qocayev Əbülfət Novruz oğlu "Batabat" MMC-nin təsisçiliyindən çıxıb. Əbülfət Qocayevin MMC-dəki payı 6 manat olub.

Qeyd edək ki, Qocayev Əbülfət Novruz oğlu adlı şəxs eyni zamanda ölkənin ən böyük meyvə-tərəvəz bazarı olan “Meyvəli”nin qanuni təmsilçisidir. 2008-ci ildə dövlət qeydiyyatına alınan “Meyvəli” MMC-nin (VÖEN-1401353861) hüquqi ünvanı Qaradağ rayonu, Lökbatan ŞTQ, Xocahəsən yolu, ev 57–də yerləşir.
Əbülfət Qocayev 2016-cı ildə “Ərzaq məhsullarının tədarükü və təchizatı” Açıq Səhmdar Cəmiyyətinin İdarə Heyətinin sədri təyin edilib. Bu qurum 2018-ci ildə ləğv olunub və onun bazasında “Aqrar tədarük və təchizat” ASC yaradılıb. Yeni qurumun İdarə Heyətinin sədri Aqil Quliyev olub.
Qeyd edək ki, mətbuatda Əbülfət Qocayevin daxili işlər naziri Vilayət Eyvazovun qaynı (həyat yoldaşının qardaşı) olduğu barədə məlumatlar yayılıb və bu günə kimi təkzib olunmayıb. /Yeniavaz.com