Qurumun mətbuat xidmətindən "AzerTaym.az"-a bildirildi ki,tədbirdə ilk öncə Azərbaycan Kooperasiya Universitetinin rektoru, Millət vəkili, preofessor Eldar Allahyar oğlu Quliyevin müəllifi olduğu sözlərə bəstələnmiş “BAŞ KOMANDANIM” adlı musiqili-klip nümayiş olunub. Klipdə respublikamızın tanınmış incəsənət nümayəndələrinin ifasında Prezident, Müzəffər Ali Baş Komandan cənab İlham Əliyevin zəngin fəaliyyətinə həsr olunmuş xüsusi məqamlara toxunulub.

Sonra universitetin Beynəlxalq əlaqələr və təlim-tərbiyə işləri üzrə prorektoru, professor Aygün Quliyeva çıxış edərək kollektivi və tələbələri təbrik edib. A. Quliyeva bildirib ki, “31 dekabr Azərbaycan xalqının tarixində ən yadda qalan, ən şərəfli günlərdən biri – Dünya Azərbaycanlılarının Həmrəylik Günüdür. Artıq son günlərini yaşadığımız 2021-ci ildə ölkə həyatının bütün sahələrində böyük nailiyyətlər qazanılmış, dövlətçiliyimizin möhkəmlənməsinə, tərəqqiyə və hərtərəfli inkişafa yönəlmiş Heydər Əliyev kursu Azərbaycan Respublikasının Prezidenti cənab İlham Əliyev tərəfindən uğurla davam etdirilmişdir.

Yeni ili qarşılamağa hazırlaşdığımız bu günlər, eyni zamanda Prezidentimiz, Müzəffər Ali Baş Komandan cənab İlham Əliyevin 60 illik yubileyi ərəfəsinə təsadüf edir. Azərbaycan xalqının Prezident İlham Əliyevə məhəbbətinin, inamının əsasında dövlətimizin başçısının liderlik keyfiyyətləri dayanır. Onu xalqa sevdirən ən mühüm xüsusiyyəti əsl dövlət başçısına xas qətiyyət, atdığı hər bir addımda milli maraqları öndə tutmasıdır. Prezident İlham Əliyevin verdiyi hər bir qərar Azərbaycan dövlətinin milli maraqlarına hesablanır. Xalqa xidmət etmək, hər bir azərbaycanlının Prezidenti olmaq onun həyat fəlsəfəsidir.

Fürsətdən istifadə edərək biz də vətəndaş kimi xalqımıza milli qürur və şərəf hissini, qələbə sevincini yaşadan, üçrəngli bayrağımızı işğaldan azad olunmuş torpaqlarımızda, Qarabağın tacı olan müqəddəs Şuşada dalğalandıran Müzəffər Ali Baş Komandanımızı ürəkdən təbrik edir, ona uzun ömür, möhkəm can sağlığı, ali dövlətçilik fəaliyyətində uğurlar arzulayırıq”.