Son həftələr, hamımızın müşahidə etdiyi kimi, milli valyutamız xarici valyutalar qarşısında möhkəmlənə və sabitliyini qoruya bilir. 

Təbii olaraq vətəndaşlarımız da bu durum qarşısında marketlərdə od tutub yanan qiymətlərin cuzi də olsa ucuzlaşacağına ümid edirlər. Belə bir deyim də var: Biri deyir: “Əzrail gəlib, bala paylayır”. Təşviş içində olanlardan bir də cavab verir: “Mənim balama dəyməsin, onun balası mənə lazm deyil”. Tam da bu günkü Azərbaycan reallığı ilə uzlaşan bir məsəldir.

“AzPolitika.info”ya müraciət edən vətəndaşımızın şikayəti də eyni ilə bu deyimi təsdiq etmiş olur.  Vətəndaşımız “Neptun” supermarketlərindən şikayət edir: “Bir neçə aydır ki, “Neptun” marketdən alış-veriş edirəm. Digər marketlətlə heç bir qiymət fərqi də yoxdur. Azərbaycanda dolların dağa dırmandığı vaxt, bu marketdən “Molfix jumbo 5 junior 36″ uşaq bezini 13.65 manata alırdıq. Fikirləşdik ki, son günlər dolların ucuzlaşması qiymətlərə də öz təsirini göstərəcək. Amma qiymətlərin ucuzlaşması bir tərəfə, sözügedən uşaq bezi üstəlik bahalaşıb. Hazırda həmin uşaq bezi nə az-nə çox, düz 15.37 manata müştərilərə təklif edilir. Dərdimizi də kimə dediksə, “Rəhbərliyin qoyduğu qiymətdir” deyib bizi yola verdilər”.

“AzPolitika”nın əməkdaşı bu şikayətlə bağlı deyilən ünvanda olub. Və məlum olub ki, vətəndaşımız şikayətində haqlıdr. Həqiqətən də bir müddət əvvəl indiki qiymətindən ucuz satılan “Molfix jumbo 5 junior 36″ uşaq bezi, elə şikayətçinin dediyi kimi 15.37 manata satılır. Haqlı olaraq sual yaranır: Ölkə rəhbərliyinin suni qiymət artımının qarşısı alınmalıdır tələbi bu market üçün keçərli deyilmi?!

AzerTaym.az