08.02.2014. - Sürücü yol polisini döyüb paqonlarını sökdü
Ağcabədi rayonunda polislə vətəndaşlar arasında insident baş verib.
AzerTaym.az-ın lent.az-a istinadən məlumatına görə, Ağcabədi Rayon Polis Şöbəsi Dövlət Yol Polisi Bölməsinin inspektoru, polis baş serjantı Mürsəl Məmmədov yol hərəkət qaydalarını pozmuş avtomobili cərimə meydançasına aparmaq istəyərkən zorakılıqla üzləşib. Avtomobilin açarlarını tələb edən yol polisinə sürücü və onun yaxın qohumu olan Orxan Abdullayev kobud şəkildə etiraz ediblər. Etiraz daha sonra davaya çevrilib.
Dava zamanı yol polisi Mürsəl Məmmədova müxtəlif dərəcəli bədən xəsarətləri yetirilib. Bu azmış kimi, onun forması və paqonları cırılıb. Hadisə ilə bağlı rayon prokurorluğunda Cinayət Məcəlləsinin 315-ci (hakimiyyət nümayəndəsinə qarşı müqavimət göstərmə və ya zor tətbiq etmə) maddəsi ilə iş başlanılıb. Orxan Abdullayev şübhəli şəxs qismində həbs edilib.
