30.09.2014 - Ə.İnsanovdan Arif Hacılıya təbrik
Həbsdə olan keçmiş səhiyyə naziri Əli İnsanov müxalif Müsavat Partiyasının yeni seçilmiş başqanı Arif Hacılını təbrik edib.
Vəkil Toğrul Babayev İnsanovun təbrik məktubunu "Turan"a təqdim edib.
“Hörmətli Arif bəy, Sizi demoktratik yolla Müsavat Partiyasının başqanı seçilməyiniz münasibəti ilə ürəkdən təbrik edirəm. Sizə gələcək siyasi fəaliyyətinizdə uğurlar arzulayıram”, - deyə təbrikdə qeyd edilir.
Xatırladaq ki. Əli İnsanov 2005-ci ilin oktyabrında parlament seçkiləri qabağı dövlət çevrilişinə cəhdə hazırlıq ittihamı ilə həbs edilib. Sonradan ittiham dəyişdirilərək iqtisadi cinayətlərlə əvəz olunub. O, 11 il müddətinə azadlıqdan məhrum edilib.
2013-cü il martın 14-də Avropa İnsan Hüquqları Məhkəməsi (AİHM) Ə.İnsanovun İnsan Hüquqları Konvensiyasının 3-cü maddəsi (işgəncələrin qadağan edilməsi) və 6-cı maddəsi (ədalətli məhkəmə çəkişməsi hüququ) ilə zəmanət verilmiş hüquqlarının pozulmasını tanıyıb və ona 10 min avro həcmində kompensasiyanın verilməsi haqda qərar çıxarıb.
AİHM-nin qərarının icrası ilə əlaqədar Azərbaycan Ali Məhkəməsinin Plenumu 2013-cü il noyabrın 15-də işi təkrar baxılmaq üçün Bakı Apelyasiya Məhkəməsinə göndərib. Bakı Apelyasiya Məhkəməsi isə İnsanovu həbsdə saxlayıb.
