Ukraynadakı Zaporojye AES-də yanğın baş verib. Stansiya ərazisindəki əsas avadanlıq yanğın nəticəsində zədələnməyib.

Yenisabah.az xəbər verir ki, bu barədə MAQATE-nin "Twitter" səhifəsində məlumat yayılıb.

Ukrayna səlahiyyətlilərinin sözlərinə görə, AES personalı təsirlərin yumşaldılması tədbirləri görür.

Yaranmış vəziyyətlə əlaqədar olaraq, Zaporojye AES-də yaranmış ciddi vəziyyətə görə MAQATE İnsident və Fövqəladə Hallar Mərkəzini tam gecə-gündüz cavablandırma rejiminə keçirib.

Son məlumata görə, Zaporojye AES-in təlim binasında yanğın davam edir.

Ukraynanın Fövqəladə Hallar üzrə Dövlət Xidmətinin "Facebook"da yaydığı məlumata görə, Enerqodar şəhərindəki Zaporojye AES-in beşmərtəbəli tədris korpusunda kəşfiyyat apardıqdan sonra üçüncü, dördüncü və beşinci mərtəbələrdəki binaların yanar olduğu müəyyən edilib.

“Ölən və ya xəsarət alan yoxdur. Yanğınsöndürmə işlərinə 44 nəfər və 11 texnika cəlb olunub. Saat 05:55-də Enerqodar şəhərindəki AES-in təlim binasında yanğın 2 min kvadratmetr sahədə lokallaşdırılıb”.

Xatırladaq, bu gün səhər saatlarında Zaporojye AES-in sözçüsü Andriy Tuz CNN-ə bildirib ki, stansiyaya ciddi ziyan dəyməyib.

Ukrayna prezidenti Vladimir Zelenski Rusiya qoşunlarının Zaporojye Atom Elektrik Stansiyasını atəşə tutduğunu bildirib. Bu barədə ö "Telegram" kanalında yerləşdirdiyi videomüraciət yayıb.

O qeyd edib: “Avropa indi oyanmalıdır: Qitənin ən böyük atom elektrik stansiyası yanır. Hazırda rus tankları atom bloklarına atəş açır. Bunlar termal kameralarla təchiz olunmuş tanklardır. Yəni onlar harada atəş açdıqlarını bilirlər. Onlar buna hazırlaşırdılar.

Mən artıq Çarlz Mişellə, Şolzla danışdım, Duda ilə danışdım, prezident Baydenlə danışdım. MAQATE rəhbəri Qrossi, həmçinin baş nazir Consonla əlaqə saxladıq. Biz hamını xəbərdar edirik: Rusiyadan başqa heç bir dövlət nüvə enerji bloklarını atəşə tutmayıb! Bu, bizim tariximizdə, bəşəriyyət tarixində ilk dəfədir ki, bir terrorçu dövlət də nüvə terroruna əl atıb.

Rusiya ordusunu dərhal dayandırmalıyıq!.. Ukrayna 15 nüvə bloku deməkdir: partlayış olsa, hər şeyin sonu, Avropanın sonu olacaq! Bu, Avropanın boşaldılmasıdır! Yalnız Avropanın təcili hərəkəti rus qoşunlarını dayandıra bilər! Avropanın atom elektrik stansiyasındakı fəlakətdən ölməsinə imkan verməyin!” - deyə Zelenski çağırıb.

ABŞ və Ukrayna prezidentləri Co Bayden və Vladimir Zelenski Zaporojye Atom Elektrik Stansiyasında baş vermiş yanğınla bağlı vəziyyəti müzakirə ediblər.

Ağ Ev bildirib ki, Bayden Zelenskiyə qoşularaq Rusiyanı bölgədəki hərbi fəaliyyətlərini dayandırmağa, yanğınsöndürmə və təcili yardım xidmətlərinin əraziyə daxil olmasına icazə verməyə çağırıb.

Bayden, həmçinin ABŞ Enerji Departamentinin Nüvə Təhlükəsizliyi və Milli Nüvə Təhlükəsizliyi Administrasiyasının (NNSA) administratoru Cill Hrubi ilə stansiyadakı vəziyyətlə bağlı yenilikləri öyrənmək üçün danışıb.