ADU-da bu şəxslər üçün ÖDƏNİŞSİZ KURSLAR təşkil olunacaq
ADU-nun Serb dili və mədəniyyəti mərkəzinin qapıları hamı üçün açıq olacaq. 
24-11-202423-11-202422-11-2024
AzerTaym.az xəbər verir ki, Azərbaycan Dillər Universitetində ölkəmizdə ilk dəfə olaraq serb dili və mədəniyyətinin tədrisinə başlanılıb.
ADU-da serb dilinin tədrisi ölkələrimizin siyasi əlaqələri yanaşı, iqtisadi, mədəni, humanitar, elmi və akademik sahələrdə də fəal əməkdaşlığının, mədəni bağlılığının möhkəmlənməsi, xalqlarımızın daha da yaxınlaşması, qarşılıqlı olaraq bir-birinin mədəniyyəti ilə tanış olması və ondan faydalanması üçün fürsətdir.
Dərslər universitetdə fəaliyyət göstərən Serb dili və mədəniyyəti mərkəzində keçirilir. Universitetin tələbələri serb dilinin tədrisi ilə yanaşı, Serbiya mədəniyyəti, ədəbiyyatı, tarixi ilə yaxından tanış olurlar.
Mərkəzdə keçirilən dərslərdə Bakı Dövlət Universitetinin Dünya ədəbiyyatı kafedrasının müdiri, cənubi slavyan ədəbiyyatının Azərbaycanda tanınmış tədqiqatçısı, professor Cəlil Nağıyevin və digər elmi, akademik dairələrin nümayəndələrinin iştirakı ilə bu dili öyrənən tələbələrə Serbiyaya aid müxtəlif mövzuda seminarların keçirilməsi nəzərdə tutulub.
Bununla yanaşı, Azərbaycan Dillər Universiteti yalnız öz tələbələri üçün deyil, həmçinin serb dilinə maraq göstərən şəxslər üçün də bir şans yaradır.
Cari ilin noyabr ayından etibarən universitetdə fəaliyyət göstərən Serb dili və mədəniyyəti mərkəzinin təşkilatçılığı ilə ödənişsiz serb dili dərsləri təşkil olunacaq. Tələbələr serb dilini başlanğıc səviyyəsindən inkişaf etdirə bilərlər.
Öyrəniləcək serb dilinin köməkliyi ilə tələbələr Avropanın Monteneqro, Xorvatiya, Serbiya, Makedoniya, Bosniya və Hersoqovinada rahatlıqla ünsiyyət qura biləcəklər.
Dərslər tələbənin tək qrammatika deyil, bütün dil bacarıqları, o cümlədən dinləmə, danışıq, sürətli oxu, akademik yazı və tənqidi təfəkkür qabiliyyətinin inkişaf etdirilməsində mühüm rol oynayacaq.
Dərs proqramına həyatın müxtəlif sahələrində gündəlik istifadədə olan mövzular, onlarla bağlı nitq tapşırıqlarını həyata keçirmək, qrammatik qaydalar, müxtəlif mövzularda müzakirələrin aparılması nəzərdə tutulub.
Dərslər uzun müddət Serbiyada yaşamış, Serb dili və mədəniyyət mərkəzinin müdiri, filologiya üzrə fəlsəfə doktoru Lalə Məcidova tərəfindən aparılacaq. Bununla yanaşı, dil daşıyıcısı tərəfindən aparılan şifahi nitq və dinləmə dərsləri tələbələrin öz bacarıqlarını inkişaf etdirməsinə şərait yaradacaq.
Maraqlanan şəxslər dərslərə yazılmaq üçün Serb dili və mədəniyyəti mərkəzinə (R.Behbudov küç.134, ADU-nun əsas binası, III mərtəbə, 301-ci otaq) müraciət edə bilərlər.
Fikirlər
-
Reklam
-
Əsas xəbərlər
