Iqtidar-Müxalifət dialoqu gözlənilir.
Bir neçə müxalifət partiyası – Klassik Xalq Cəbhəsi Partiyası, Azərbaycan Demokrat Partiyası, Azərbaycan Liberal-Demokrat Partiyası və Azərbaycan Xalq Partiyası rəhbərləri ölkədəki ictimai-siyasi vəziyyəti müzakirə etmək üçün Prezident Administrasiyası İctimai-siyasi məsələlər şöbəsinin müdiri Əli Həsənovla görüşəcək.
KXCP sədri Mirmahmud Mirəlioğlu AzVision.az-a açıqlamasında bildirib ki, görüşdə ilk olaraq onların təklifi ilə “siyasi məhbus” məsələsi müzakirə olunacaq:
“Biz hələlik yalnız bunu və daha vacib məsələləri müzakirəyə çıxarmaq niyyətindəyik”.
M.Mirəlioğlu Əli Həsənovla görüşün gündəliyinin hələlik müəyyən edilmədiyini deyib.
“Görüşün təşəbbüskarı bizik, biz müraciət etmişik və müraciətimiz qəbul olunub”.
Müxalifət-iqtidar dialoqunda AXCP və Müsavat Partiyaları iştirak etməyəcək.
Müsavat başqanının müavini Gülağa Aslanlı AzVision.az-a açıqlamasında PA rəsmisi ilə görüşdü iştirak etməyəcəklərini təsdiqləyib.
“Müsavat partiyası bu görüş üçün müraciət imzalamayıb. Bunun səbəbi isə həmin görüşdə müzakirə olunacaq məsələlərin həll olunacağına inamamağımızla bağlıdır. Hesab edirik ki, bu məsələlər ölkə başçısının səlahiyyəti daxilindədir”.
AXCP sədrinin müavini Fuad Qəhrəmanlı görüşdə iştirak etmək istəmədiklərini deyib.
