Moskvada Azərbaycan vətəndaşı güllələnərək öldürülüb - VİDEO
Moskvada Azərbaycan vətəndaşı güllələnərək öldürülüb. APA-nın xəbərinə görə, bu barədə RİA Novosti agentliyinə hüquq-mühafizə orqanlarındakı mənbə məlumat verib. *** Moskvada odlu silahdan açılan atəş nəticəsində öldürülən azərbaycanlının kimliyi məlum olub. APA-nın REN TV-yə istinadən verdiyi xəbərə görə, bu, qara və əlvan metalların alışı və satışı ilə məşğul olan iş adamı, 49 yaşlı Rəhman Əliyevdir. 
Hadisə bu gün Moskvanın cənubunda baş verib. “Azərbaycan vətəndaşı yaxın məsafədən açılan atəş nəticəsində ölüb. Qətlin əvvəlcədən planlaşdırıldığı güman edilir. Hazırda sifarişli qətl versiyası nəzərdən keçirilir”, mənbə bildirib.
Moskva üzrə Daxili İşlər Nazirliyi Baş İdarəsindən faktı təsdiqləsələr də, hadisənin detallarını açıqlamayıblar.
Şahidlərin sözlərinə görə, R.Əliyev avtomobilini Xarkov keçidində saxlayaraq yaxınlıqda yerləşən anbarlara tərəf gedib. Bir neçə güllə yarası alan R.Əliyev hadisə yerində keçinib.
Faktla bağlı cinayət işi açılıb, araşdırma aparılır.
